Cristiano Ronaldo er leikmaður 18. umferðar

Cristiano Ronaldo heldur áfram að vera þyngdar sinnar virði í gulli fyrir Englandsmeistara Manchester United. Þessi ótrúlegi vængmaður er nú orðinn markahæsti leikmaður ensku úrvalsdeildarinnar eftir að hafa skorað bæði mörkin í 2-1 sigri á Everton.

Smelltu hér til að sjá myndband af leikmanni 18. umferðar - Cristiano Ronaldo.

Það er ekki af ástæðulausu sem margir eru á þeirri skoðun að Cristiano Ronaldo hefði átt að vera valinn knattspyrnumaður ársins frekar en Kaka. Þessi töframaður með boltann hefur verið hreint magnaður á árinu og lék lykilhlutverk þegar United tryggði sér enska meistaratitilinn.

Ronaldo er fæddur árið 1985 í Portúgal. Hann var skírður í höfuðið á Ronald Reagan, fyrrum forseta Bandaríkjanna, en faðir hans hafði mikið álit á þeim manni. Ronaldo vakti fljótlega athygli fyrir gríðarlega tækni og þegar Sir Alex Ferguson leitaði að kantmanni eftir að David Beckham fór þá ákvað hann að kaupa Ronaldo frá Sporting Lissabon.

Fyrsti leikur Ronaldo var þegar hann kom inn sem varamaður gegn Bolton. Hann heillaði áhorfendur með brögðum sínum og ljóst var að ný stjarna væri mætt á Old Trafford.

Stjarna Ronaldo hefur skinið skært alveg síðan. Hann hefur leikið 51 leik fyrir portúgalska landsliðið og skorað í þeim tuttugu mörk. Á heimsmeistaramótinu í fyrra var honum kennt um að Wayne Rooney fékk að líta rauða spjaldið í leik Portúgals og Englands. Eftir það var púað á hann á nánast hverjum velli á Englandi.

Ronaldo sýndi þó hve sterk persóna hann er og stóð það af sér þrátt fyrir ungan aldur. Hann hefur lýst því yfir að hann sé hæstánægður í herbúðum Manchester United og virðist sérstakt samband milli hans og Ferguson knattspyrnustjóra. Hann hefur þó lýst því yfir að einn daginn vilji hann leika á Spáni.

Það sem af er þessu tímabili hefur Ronaldo hreint verið magnaður og klárað marga leiki fyrir United nánast upp á eigin spýtur.

Fullt nafn: Cristiano Ronaldo dos Santos Aveiro.

Fæddur: 5. febrúar 1985 á Madeira í Portúgal.

Félög: Sporting Lissabon og Manchester United.

Númer: 7