Airbus gæti þurft að færa verksmiðjur vegna dollars

Hratt fall Bandaríkjadollara ógnar flugvélaframleiðandanum Airbus sem mun þurfa að færa framleiðslu sína til landa þar sem dollarinn er við lýði. Þetta segir Louis Gallois framkvæmdastjóri EADS móðurfélags Airbus í viðtali við þýska blaðið Welt am Sonntag.

Hann tók einnig undir orð Tom Enders yfirmanns fyrirtækisins sem lýsti lækkandi gengi dollars sem lífshættulegu fyrir Airbus í Toulouse þar sem stórar farþegavélar eru framleiddar.

„Það er augljóst að viðvarandi ógn er af stöðu dollars - ekki strax, en til lengri tíma litið," sagði Gallois þýska blaðinu Welt am Sonntag. Hann sagði að miðað við þessar forsendur væri ekki hægt að gera framtíðarplön á áreiðanlegan hátt.

Airbus selur vélar sínar í dollurum en næstum helmingur kostnaðar er í Evrum. Það gerir fyrirtækið afar viðkvæmt fyrir sveiflum á milli gjaldmiðlanna tveggja. Í gær fór Evran upp í 1.4966 á móti dollar sem er hæsta gengi Evru fram að þessu.

Fyrirtækið á í vandræðum við að mæta kostnaði vegna tafar á risafarþegaþotunni A380, sem hefur þrýst á uppsögn 10 þúsund manns og sölu á framleiðslunni.

Endurskipulagningaráætlun fyrirtækisins er grundvölluð á því að staða dollarans sé 1.3-1.35. Airbus hefur nú þurft að endurskoða fyrirætlaðan niðurskurð á kostnaði af því að hann er ekki nægur.