iPhone seldist vel um helgina

Þúsundir gerðu sér far í verslanir Apple nú um helgina til að fjárfesta í nýjum iPhone. Allt að 200 þúsund tæki voru seld á föstudag, en það var fyrsti söludagur. Þó tækið hafi verið fáanlegt í 164 Apple verslunum í gær er ljóst að meginþorri birgða er uppurinn.

„Stór hluti verslana okkar hefur selt allar birgðar sínar. Við reynum að endurnýja birgðir eins fljótt og við getum," sagði Mark Siegel, talsmaður AT&T í San Antonio.

Salan er í samræmi við væntingar flestra og gefur Apple trausta stöðu á farsímamarkaði. Steve Jobs, forstjóri Apple, treystir á að iPhone verði þriðja mesta tekjulind fyrirtækisins eftir iPod spilurum og Macintosh tölvum. iPhone samtvinnar netsímatæknina og iPod tónlistaspilara.

Siegel sagði að sumir kaupendur hefðu átt í erfiðleikum með að virkja símana sína vegna þess hve margar tölur þurfi að slá inn. Einnig hafi verið seinkanir vegna kúnna sem voru að færa sig frá öðrum fyrirtækjum.