Sex mánaða drengur lenti næstum í aurflóði

Sex mánaða gamall drengur var hársbreidd frá því að lenda í aurflóði á Sauðárkóki í gær. Sum hús eru illa farin eða ónýt eftir hamfarirnar en hreinsunarstarf gengur vel.

Þessi hluti bæjarins er eins og vígvöllur að sjá eftir að vatnsstokkur gaf sig með þeim afleiðingum að aur og drulla rústuðu heimilum íbúa við Lindargötu í gærmorgun. Sum húsanna eru algjörlega óíbúðarhæf og jafnvel ónýt. Nokkrar fjölskyldur hafa neyðst til að yfirgefa heimili sín en fólk hrósar happi yfir að enginn hafi slasast.

Fáir voru þó heppnari en móðir hér við Lindargötu 15 sem hafði komið syni sínum fyrir í barnavagni utan við húsið rétt áður en aurflóðið brast á og hlífði engu.

Og frásagnir sjónarvotta eru flestar á þann veg að þeir hafi hreinlega ekki trúað sínum eigin augum þegar vatn og aur sótti að íbúum úr þremur áttum.

Eins og greint var frá í gær varð bilun hjá Rarik til þess að svo fór sem fór en bæjarverkfræðingur treystir sér ekki til að svara spurningum um bótaskyldu á þessu stigi.