Hlutabréf hækka í verði í Asíu og Evrópu

Verð á hlutabréfum hækkaði á mörkuðum í Evrópu og Asíu við opnun í morgun. Japanska Nikkei vísitalan hækkaði um þrjú prósent sem er mesta hækkun vísitölunnar í yfir þrettán mánuði. Í síðustu viku féll Nikkei vísitalan um 9 prósent.

Mikil ólga hefur verið á heimsmörkuðum um nokkurt skeið í kjölfar lækkandi fasteignaverðs í Bandaríkjunum og hárra stýrivaxta.

Í Evrópu hækkuðu hlutabréf við opnun markaða í morgun. FTSEurofirst 300 vísitalan hækkaði um 1,4 prósent og breska FTSE 100 vísitalan hækkaði um 1,5 prósent. Þá hækkaði þýska vísitalan DAX um 0,9 prósent og franska CAC 40 um 1,4 prósent.