Alfreð ósáttur með vinstri vænginn

Alfreð Gíslason var þokkalega sáttur við varnarleik og markvörslu íslenska liðsins í leiknum gegn Rússum í kvöld, en öfugt við leikinn við Dani var það sóknarleikurinn sem varð liðinu að falli í kvöld. Alfreð sagði íslenska liðið hafa gefið leikinn frá sér og var ósáttur við frammistöðu leikmanna á vinstri vængnum.

"Við vorum komnir fjórum mörkum undir á kafla en náðum svo að snúa dæminu við og komast tveimur yfir. Þá fáum við víti en klikkum á því og það sem eftir það gerðist var bara sorglegt. Maður getur auðvitað alltaf klúðrað víti, en svo fara ein fjögur dauðafæri af línu og þeir taka Óla úr umferð. Það var ekkert að koma frá vinstri vængnum hjá okkur og það er bara ekki nógu gott. Snorri var auðvitað ekki alveg á fullu í dag eftir veikindi, en hann var þó að skapa fyrir línunmennina.  Við bara hleyptum Rússunum inn í þennan leik með því að klikka á öllum þessum dauðafærum og gáfum þeim leikinn.

Varnarleikurinn var mun betri en í síðasta leik og Birkir varði vel með einhverja 17-18 bolta. 6-0 vörnin var lengst af að virka ágætlega ef undan eru skildar nokkrar línusendingar hjá þeim, en það var fyrst og fremst sóknarleikurinn sem var að klikka hjá okkur í dag.

Þetta var ekki jafn slæmt og Úkraínuleikurinn en við vorum ekki að fá neina ógnun frá vinstri vængnum og fyrir vikið er línan ekki frí. Óli og Alex hafa báðir spilað vel í þessari keppni en Óli var tekinn úr umferð og Alex orðinn mjög þreyttur - og þá verða þessir menn sem eru að koma ferskir inn að standa sig betur en þeir gerðu í dag.

Nú keyrum við til Kölnar og hvílum okkur á morgun, en svo erum við að fara mæta liði Spánverja sem er sterkara lið en Rússarnir og þar verða þeir sem hafa verið að spila vel í keppninni að halda áfram á sama styrk og þeir sem ekki léku vel í dag að sýna á sér hitt andlitið. Við viljum auðvitað klára þessa keppni vel. Hún hefur verið ágæt fram að þessu og við verðum að reyna að ná 7. sætinu," sagði Alfreð í viðtali við Arnar Björnsson, íþróttafréttamann á Stöð 2 í kvöld.