Kreppir að hjá Sothebys

Fjármálavandræðin á Wall Street hafa nú náð inn í virðulega sali uppboðsfyrirtækisins Sothebys.

Hlutabréf í fyrirtækinu féllu um þriðjung í gær sökum ótta um að fjárfestar væru byrjaðir að halda að sér höndunum við kaup á dýrum listaverkum.

Á uppboði í vikunni náðist ekki að selja 20 af 70 munum sem boðnir voru upp og þeir sem á annað borð seldust fóru langt undir matsverði. Meðal verka sem ekki tókst að selja var málverk eftir Van Gogh sem hann málaði aðeins örfáum dögum fyrir sjálfsmorð sitt árið 1890.