Kínverskir og arabískir ofursjóðir hleypa lífi í markaðinn

Kínverskir og arabískir ofursjóðir hafa hleypt lífi í kauphallir á Vesturlöndum undanfarna daga með kaupum í fjármálafyrirtækjum og bönkum. Börsen.dk fjallar um þetta spáir því að kaup þessara sjóða muni aukast verulega á næstu mánuðum.

Til að fá einhverja hugmynd um þær gríðarlegu upphæðir sem fyrrgreindir sjóðir hafa til ráðstöfunar má nefna úttekt Morgan Stanley á þeim. Samkvæmt henni hafa sjóðir þessir rúmlega 130.000 milljarða kr. til ráðstöfunnar.

Greining Kaupþings fjallar um þessa sjóði í Hálffimm fréttum sínum. Þar segir m.a. að það hafi færst í vöxt að fjárfestar frá Miðausturlöndum og Suðaustur-Asíu eignist áberandi hluti í vestrænum fjármálastofnunum. Kínversk stjórnvöld stofnsettu í haust fjárfestingarsjóð, sem er með 200 milljarða, Bandaríkjadala umleikis, í þeim tilgangi að ávaxta gjaldeyrisforða landsmanna.

Annað stærsta tryggingafélag Kína, Ping An, hefur keypt 4,18% í Fortis - belgíska fjármálaþjónustufyrirtækinu - fyrir 1,81 milljarð evra (rúma 160 milljarða króna) en kaupin eru athyglisverð fyrir þær sakir að þetta er í fyrsta sinn sem Kínverjar fjárfesta í erlendu tryggingafélagi. Þau gefa jafnframt Fortis færi á að komast inn á kínverska markaðinn.

Kínversk stjórnvöld hafa hvatt kínversk fjármálafyrirtæki eindregið til þess að fjárfesta erlendis og eru kínversk fyrirtæki á meðal stórra hluthafa í Bear Stearns, Blackstone og Standard Bank Group. Kínverski þróunarbankinn eignaðist hlut í Barclays þegar breski bankinn reyndi án árangurs að komast yfir ABN Amro. China Life, stærsta tryggingafélag Kína, hefur einnig á prjónunum að byggja upp stöður í tryggingafélögum í Evrópu og Norður-Ameríku.



Í vikunni setti félag í eigu stjórnvalda í Abu Dhabi (ADIA) í Sameinuðu arabísku furstadæmunum um 7,5 milljarða dollara inn í Citigroup sem heimilt er að breyta í 4,9% eignarhlut. ADIA verður þar með stærsti hluthafinn í Citigroup, rétt á undan Alwaleed bin Talal prins frá Sádi-Arabíu. Fleiri fjárfestar frá miðausturlöndum hafa séð sér hag að fjárfesta í fjármálafyrirtækjum á Vesturlöndum. Dubai International Capital LLC hefur fjárfest í HSBC Holding, stærsta banka Evrópu, og vogunarsjóðnum Och-Ziff Capital Management. Á móti hafa vestrænir fjárfestar fjárfest grimmt í Kína og HSBC á einmitt yfir 16% eignarhlut í Ping An.