Besti ársfjórðungur í sögu Ticket

Eggert Þór Aðalsteinsson

skrifar

Árið fer vel af stað hjá sænsku ferðaskrifstofukeðjunni Ticket Travel Group en fyrsti ársfjórðungur var sá besti í sautján ára sögu félagsins. Hagnaður eftir skatta nam 162 milljónum króna sem er þrjátíu prósenta aukning á milli ára. Veltan var rúmir 13,5 milljarðar króna og jókst um 48 prósent. Rekstrarhagnaður fyrir fjármagnsliði (EBIT) hækkaði um fjörutíu prósent.

„Árið fer frábærlega af stað hvað veltu og rekstrarhagnað varðar, sérstaklega í sölu á ferðalögum til einstaklinga. Vöxturinn er eðlilegri í sölu á viðskiptaferðalögum,“ segir Lennart Käll, forstjóri Ticket, sem þakkar árangurinn markvissara sölustarfi og miklum viðsnúningi á rekstri félagsins í Noregi. Hann segir að viðskiptavinir séu fyrr á ferðinni hvað varðar kaup á ferðum fyrir næsta vetur og dvelji lengur á áfangastöðum en áður. Þetta endurspeglist í breyttri hegðun viðskiptavina: Fyrir tíu árum var fyrsta skrefið að bóka flug, svo hótel og síðast að athuga hvernig ætti að verja tímanum í fríinu. Nú er öldin önnur, viðskiptavinurinn velti því fyrst fyrir sér afþreyingunni áður en kemur að því að bóka flug og hótel. Til marks um stærð Ticket þá fyllir fyrirtækið 25 Boeing 737-farþegaþotur á degi hverjum og rekur 87 söluskrifstofur í Noregi og Svíþjóð.

Ticket selur ekki einvörðungu ferðalög til suðlægari slóða heldur einnig viðskiptaferðalög, til dæmis í tengslum við fundi og ráðstefnur. Þetta er ört vaxandi markaður í Skandinavíu eins og annars staðar í heiminum.

Fyrirtækið er að stærstum hluta í eigu íslenska eignarhaldsfélagsins Northern Travel Holding (29,3%) en talið er að heildarhlutur Íslendinga nemi um helmingi hlutafjár. „Við getum ekki annað en verið ánægðir með niðurstöðuna. Fyrsti ársfjórðungur 2006 var sá langbesti í sögu fyrirtækisins og nú erum við að bæta okkur enn frekar. Ég tel að þetta verði mjög gott ár fyrir alla, hluthafa, stjórn og stjórnendur,“ segir Matthías Páll Imsland, stjórnarformaður Ticket.

Forystumenn Ticket hafa lýst yfir vilja sínum að vera í forystu á norrænum ferðaþjónustumarkaði. Það er hægt annars vegar með því að stækka innan Svíþjóðar og Noregs, en jafnframt sækja inn til Danmerkur og jafnvel Finnlands. Á aðalfundi Ticket í Stokkhólmi í síðustu viku samþykktu hluthafar tillögu stjórnar um að ekki yrði greiddur arður til þess að styðja við ytri vöxt félagsins. „Við getum ekki bara staðið okkur vel með því að vaxa innan frá. Við verðum líka að taka yfir góð fyrirtæki eða illa rekin fyrirtæki sem gætu orðið betri undir okkar stjórn,“ segir Lennart.

Það vakti athygli á fundinum að Gunnar Ek, formaður hinna gagnrýnu samtaka sænskra fjárfesta, sem mæta á alla aðalfundi skráðra félaga, hrósaði stjórnendum og stjórnarformanni sérstaklega fyrir eftir að hafa spurt þá spjörunum úr allan fundinn um öll möguleg og ómöguleg atriði. Sagði hann félagið vera sterkt og stjórnendur þess hafa skýra stefnu.