Samruni námurisa úr sögunni?

Námurisinn Rio Tinto hafnaði í dag yfirtökutilboði frá BHP Billiton, stærsta námuvinnslufyrirtæki í heimi. Við samrunann hefði orðið til virði hins nýja félags orðið 45 þúsund milljarða króna virði.

Eftir því sem Reuters greinir frá höfðu verið upp hugmyndir um samruna fyrirtækjanna í nokkurn tíma en virði Rio Tinto er talið um 17.500 milljarða króna. Buðu BHP-menn þrjá hluti fyrir hvern einn frá Rio Tinto en það tilboð þótti forsvarsmönnum þess síðarnefnda ekki nógu gott. Vegna frétta af yfirtökutilboðinu hækkuðu bréf í Rio Tinto í í kauphöllinni í Lundúnum um nærri 30 prósent í morgun og hafa þau aldrei verið hærri.

Forsvarsmenn BHP segja í tilkynningu að þeir séu ekki af baki dottnir í málinu en verði af samrunanum er um að ræða næststærstu yfirtöku sögunnar. Sú stærsta var yfirtaka símafyrirtækisins Vodafone á fyrirtækinu Mannesmann árið 2000. Samanlagt virði Rio Tinto og BHP yrði 360 milljarðar punda, jafnvirði um 45 þúsund milljarða króna, sem gerði fyrirtækið að svipaðri stærð og Microsoft.

Tíðindin koma í kjölfar þess að Rio Tinto gekk í gær frá kaupum á álfyrirtækinu Alcan sem meðal annars rekur álverið í Straumsvík. Kaupverðið þar nam nærri fimm þúsund milljörðum króna. Umhverfisverndarhópar og samtök hafa gagnrýnt Rio Tinto og sakað félagið um að virða ekki umhverfið, öryggismál og réttindi verkamanna í námum.