Phoenix vann nauðsynlegan sigur

Phoenix lagði San Antonio á nokkuð sannfærandi hátt 101-81 í öðrum leik liðanna í undanúrslitum Vesturdeildarinnar í NBA í nótt. Staðan í einvíginu er því orðin jöfn og næstu tveir leikir fara fram í San Antonio. Cleveland náði 2-0 forystu gegn New Jersey með sigri á heimavelli.

Þjálfari Phoenix stokkaði upp í liði sínu og gerði breytingar eftir tapið í fyrsta leiknum og lét Kurt Thomas í byrjunarliðið til að dekka Tim Duncan og lét framherjann Shawn Marion gæta leikstjórnandans Tony Parker. San Antonio var yfir eftir fyrsta leikhlutann, en síðan tóku heimamenn völdin og unnu nauðsynlegan sigur.

Amare Stoudemire skoraði 27 stig og hirti 9 fráköst fyrir Phoenix, Steve Nash skoraði 20 stig og gaf 16 stoðsendingar og Raja Bell skoraði 18 stig. Tim Duncan skoraði 29 stig og hirti 11 fráköst fyrir San Antonio en fékk litla hjálp frá félögum sínum í þetta skiptið. Tony Parker og Bruce Bowen skoruðu 13 stig hvor og Manu Ginobili var ósýnilegur í sókninni annan leikinn í röð með aðeins 6 stig.

Cleveland vann sigur á New Jersey 102-82 í öðrum leik liðanna í undanúrslitum Austurdeildarinnar og hefur nú náð 2-0 forystu í einvígi liðianna þegar næstu tveir leikir fara fram í New Jersey. Rétt eins og í fyrri leiknum voru það yfirburðir Cleveland í fráköstunum (49-32) sem höfðu mikið að segja um niðurstöðuna.

LeBron James var öflugur í liði Cleveland og skoraði 25 af 36 stigum sínum í síðari hálfleik. Hann gaf auk þess 12 stoðsendingar. Sasha Pavlovic setti persónulegt met í úrslitakeppni með 17 stigum. Hjá New Jersey skoraði Vince Carter 26 stig, Richard Jefferson skoraði 22 stig og Jason Kidd skoraði 17 stig, hirti 10 fráköst og gaf 8 stoðsendingar.