Verður allt að vopni

Íslands ógæfu verður allt að vopni, var eitt sinn sagt þegar hver óáranin rak aðra. Kaupþingsmenn hafa fengið sinn skerf að undanförnu. Þannig hefur auglýsingum þeirra verið snúið upp á háa vexti og miklar skuldir landsmanna með grátandi fólki. Þar við bætist umræða um flottræfilshátt vegna auglýsinga með John Cleese og svo hefur árlegt partí í London verið milli tanna einhverra.

Nú er það reyndar svo að partíið í London er ekki á vegum Kaupþings, heldur er það einka-partí Ármanns Þorvaldssonar. Þannig að það er óþarfi að snúa því upp á bankann. Engum kemur við hvernig Ármann kýs að gleðja vini og vandamenn, auk þess sem telja má að þrátt fyrir kostnað af veislunni megi auðveldlega finna marga sem eyða stærri hluta launa sinna í djamm en Ármann.