RBS afskrifi 250 milljarða

Búist er við að stjórn Royal Bank of Scotland afskrifi um tvo milljarða punda, eða nálægt 250 milljörðum króna, vegna undirmálslánakreppunnar á Bandaríkjamarkaði.

Fjallað er um málið í sunnudagsútgáfu The Telegraph, en þar segir að hluthafar í RBS hafi gert kröfu um að bankastjórnin geri hreint fyrir sínum dyrum. Upphæðin mun þó ekki öll vegna undirmálslána, heldur kemur þar einnig til tap vegna kaupa á ABN Amro.

Hlutabréfaverð RBS hefur fallið um 30 prósent í ár. Bankanum er á móti talinn til tekna 3 milljarða punda hagnaður í ár af eign í Bank of China, auk 4 milljarða punda hagnaðar sem vænst er af sölu járnbrautarfélagsins Angel Trains.

RBS er vel kunnur í fjármálalífinu hér, en bæði Kaupþing og Landsbankinn hafa átt samstarf með bankanum við fjármögnun einstakra verkefna.