Gísli Marteinn: Björn Ingi er konungur smjörklípunnar

Gísli Marteinn Baldursson, borgarfulltrúi Sjálfstæðisflokksins, deildi hart á Björn Inga Hrafnsson á borgarstjórnarfundi í dag vegna REI-málsins og kallaði Björn Inga meðal annars konung smjörklípunnar.

Minnihlutinn og meirihlutinn hafa deilt hart um málefni REI á fundi borgarstjórnar í dag. Svandís Svavarsdóttir, borgarfulltrúi Vinstri - grænna, sagði meðal annars á fundinum að skipið Reykjavik Energy Invest hefði verið stefna í siðferðilegt og pólitískt skipbrot. Þá sagði hún menn hafa gengið um með milljarðaglampa í augum í málinu

Bæði Hanna Birna Kristjánsdóttir og Gísli Marteinn Baldursson, borgarfulltrúar Sjálstæðisflokksins, sögðu að enginn hefði staðið vörð um hagsmuni Orkuveitunnar í málinu.

Gísli Marteinn vakti einnig athygli á orðum Svandísar og sagði að menn þyrftu ekki lengi að líta yfir borgarstjórnarsalinn til þess að sjá við hvern Svandís ætti þegar hún hefði talað um milljarðaglampa í augum. Þá sagði hann stjórnarmenn REI hafa brugðist hlutverki sínu en í stjórn REI hefði aðeins verið einn stjórnmálamaður, Björn Ingi Hrafnsson.

Gísli Marteinn minntist einnig á orð Svandísar um siðferðilegt og pólitískt skipbrot sem REI hefði stefnt í. Sagði hann aðeins einn borgarfulltrúa viljað halda þeim kúrsi, Björn Inga Hrafnsson. Hann hefði sett fram þá kröfu að ef eigendafundur Orkuveitunnar 3. október yrði gerður ólöglegur yrði boðað til annars eigendafundar og samruni REI og GGE samþykktur aftur.

Þá sagði Gísli að Björn Ingi hefði reynt að gera það að einhverju máli að Geir og Vilhjálmur hefðu fundað um málefni REI en fram hefði komið að 20 ára þjónustusamningur REI og OR hefði ekki verið ræddur þar. Með þessari vendingu sýndi Björn Ingi að hann væri konungur smjörklípunnar.

Þá sagði Gísli Marteinn að sjálfstæðismenn hefðu óskað eftir því að umboðsmaður Alþingis kæmi á fund stýrihóps um málefni REI og færi yfir vinnuna. Mikilvægt væri að draga alla hluta málsins fram í ljósið.

Svikabrigsl og dylgjur á borgastjórnarfundi

Björn Ingi Hrafnsson, borgarfulltrúi framsóknarmanna, benti á að þetta væri í þriðja sinn sem REI-mál væru rædd í borgarstjórn. Í fyrsta skipti hefðu sjálfstæðismenn þagað þunnu hljóði en í næstu umræðu hefði fúkyrðum rignt yfir hann. Hann sagði enn fremur að á fundinum í dag hefðu stór orð fallið í hans garð og sömuleiðis fulltrúa Sjálfstæðisflokksins í stjórn Orkuveitunnar og REI. Önnur eins svikabrigsl og dylgjur hefðu varla heyrst á borgarstjórnarfundi eins og í dag.

Þá sagði Björn Ingi að hann hefði fremur átt von á dauða sínum en að verða vitni að þeim klofningi sem væri innan Sjálfstæðisflokksins. Í borgarstjórnarflokknum væri hver höndin upp á móti annnarri og gerð hefði verið uppreisn gegn leiðtoganum Vilhjálmi Vilhjálmssyni. Hann hefði unnið þá höfuðsynd að vinna sigur í prófkjöri flokksins fyrir síðustu borgarstjórnarkosningar.

Björn Ingi sagði enn fremur að prinsipp sjálfstæðismanna í REI-málinu, um að opinber fyrirtæki ættu ekki að vera í áhættufjárfestingum, væri nýtilkomin enda hefði Guðlaugur Þór Þórðarson, heilbrigðisráðherra og fyrrverandi stjórnarformaður Orkuveitunnar, markað stefnuna í orkuútrásinni. Sjálfstæðismenn væru því í mótsögn við sjálfa sig í málinu.