Markaðstorg í miðju Stokkhólms

Debenhams á Drottningargötunni var lokað um miðjan janúar. Strax eftir lokun var hafist handa við að breyta búðinni. Åke Hellqvist og hans fólk breytti búðinni í verslunarmiðstöð tísku fyrir ungt fólk á níu vikum. „Við gerðum þetta á íslenskum hraða,“ segir Åke og glottir þreytulega, en yfirvinnugleði þar í landi er ekki sú sama og þekkist á Íslandi.

Allt er að smella fyrir kvöldið og von á fjölda gesta. „Kändisarnir“ eins og Svíar kalla fræga fólkið tínist inn eftir rauða dreglinum.

Debenhams náði ekki fótfestu á markaðnum. Jón Ásgeir Jóhannesson segir að Debenhams hafi eftir að það komst í einkaeigu sett stefnuna á Bretland og svo vaxtarmarkaði. Áherslan hafi því ekki orðið á fyrirbæri eins og verslunina í Stokkhólmi.

Baugur og Arcadia tóku því höndum saman og settu vörumerki sín fyrir ungt fólk á einn stað. „Þetta er spennandi verkefni og ef þessi tilraun gengur upp munum við halda áfram að opna slíkar verslanir í helstu stórborgum,“ segir Jón Ásgeir.

Vöruhúsið er í eigu Baugs og fékk nafnið SOUK. Nafnið er fengið frá Austurlöndum og þýðir markaðstorg eða samkomustaður. Hugmyndin er að búa til deiglu tísku og lífsstíls ungs fólks í miðbæjum stórborga. Reyndar má leika sér með nafnið og lesa það „so UK“ enda eru vörumerki hússins bresk.

Verslunarmiðstöðin fyllist hratt af fólki og Åke og Gunnar Sigurðsson, sem stýrir smásölufjárfestingum Baugs, stíga á svið og ávarpa gesti með tilheyrandi þökkum til þeirra sem lagt hafa nótt við dag til að hægt sé að halda upp á daginn. Gestir taka nýrri búð vel og suðið í afgreiðslukössunum byrjar þegar, enda margir sem ekki standast freistinguna að kaupa svolítið í leiðinni, enda þótt samkoman sé meira hugsuð sem partí.