Jötunn kominn í Sundahöfn

Eimskip hefur tekið á móti nýjum færanlegum hafnarkrana í Sundahöfn. Kraninn hefur fengið viðeigandi nafn og kallast Jötunn.

Fjárfestingin er sögð til komin vegna aukinna umsvifa félagsins á Austurlandi út af skipaafgreiðslu fyrir Alcoa Fjarðaál.

Hafnarkraninn er af gerðinni Gottwald HMK 6407 og smíðaður í Þýskalandi. Hann kemur í stað eldri krana af sömu tegund sem verður fluttur austur á Reyðarfjörð.

„Nýi kraninn var fluttur til landsins, fullsamsettur, á vegum félagsins Big Lift Shipping sem sérhæfir sig í þungaflutningum á sjó. Skipið sem flutti kranann er búið tveimur 250 tonna krönum enda má ekki minna vera þar sem nýi kraninn vegur um 420 tonn,“ segir í tilkynningu Eimskips.

Nýi kraninn var nefndur Jötunn eftir nafnasamkeppni meðal starfsfólk. Eldri kranar Eimskips nefnast Jakinn og Jarlinn.

„Jötunn hefur 110 tonna lyftigetu, er með 950 hestafla vél og er 420 tonn að þyngd. Hann er 35 metra hár og með 51 metra langa bómu.“ Eimskip rekur nú tvo stóra gámakrana í Sundahöfn, sem lyfta samtals hátt í 100.000 gámum á ári.