Óbreytt landsframleiðsla innan OECD

Landsframleiðsla jókst um 0,6 prósent að meðaltali innan aðildarríkja Efnahags- og framfarastofnunarinnar (OECD) á öðrum fjórðungi ársins, samkvæmt bráðabirgðatölum stofnunarinnar. Þetta er óbreytt niðurstaða frá fjórðungnum á undan.

Landsframleiðsla jókst mest á milli fjórðunga í Bandaríkjunum og Bretlandi, eða um 0,8 prósent, en viðlíka aukning hefur ekki sést vestanhafs síðan á fyrsta fjórðungi síðasta árs. Í Japan og á Ítalíu dróst landsframleiðsla hins vegar saman á milli fjórðunga og nam 0,1 prósenti sem er með lægsta móti innan OECD. Svipaða sögu er að segja um landsframleiðslu á Evrópusvæðinu en hún dróst saman um 0,4 prósentustig og nam 0,3 prósentum. Ekki liggja fyrir tölur um landsframleiðslu hér á landi en þær verða birtar eftir miðjan næsta mánuð.

Sé litið til breytinganna á milli ára jókst landsframleiðsla mest í Bretlandi, um 3,0 prósent, en minnst í Frakklandi, 1,3 prósent.