Forstjóralaunin fryst

Breski olíurisinn BP hefur fryst launagreiðslur til Johns Browne, fyrrum forstjóra fyrirtækisins, og Johns Manzoni, fyrrum yfirmanns olíuvinnslu og markaðsstjóra hjá fyrirtækinu. Ákvörðunin var tekin eftir að hluthafar fyrirtækisins höfðuðu mál gegn núverandi og fyrrverandi stjórnendum fyrirtækisins.

Hluthafarnir segja olíuleka hjá fyrirtækinu við Prudhoe-flóa í Alaska í ágúst í fyrra og sprengingu við olíuhreinsunarstöð í Texas í Bandaríkjunum árið 2005 hafa valdið því að gengi bréfa þeirra í fyrirtækinu hefur lækkað mjög í verði. Stjórnendur olíufyrirtækisins eru sakaðir um vanrækslu í starfi og of mikla aðhaldssemi í rekstri fyrirtækisins sem hafi komið alvarlega niður á fyrirtækinu. Tæring var í olíuleiðslum fyrirtækisins í Alaska sem olli því að leiðslurnar brustu. Olíuframleiðsla fyrirtækisins skertist um átta prósent. Munar um minna enda voru áhrifin þau að heimsmarkaðsverð á hráolíu hækkaði mikið á tímabilinu. Fyrirtækið vinnur nú að því að hætta olíuvinnslu við flóann. Sprengingin í Texas var hins vegar mun alvarlegra mál enda er stjórnendum fyrirtækisins gefið að sök að hafa dregið mjög úr öryggismálum í olíuhreinsunarstöðinni í hagræðingarskyni. Fimmtán starfsmenn létust í sprengingunni og standa málaferli enn yfir gegn stjórnendum BP vegna þessa.

Þetta þykja ekki góðar fréttir fyrir Browne, sem hætti óvænt störfum hjá BP í maí síðastliðnum, tveimur mánuðum fyrr en hann hafði ráðgert eftir að hann tapaði dómsmáli í Bretlandi þar sem hulunni var svipt af samkynhneigð hans og kynnum hans af ástmanni. Browne átti í ástarsambandi við kanadískan mann sem seldi frétt sína af sambandinu til fjölmiðla í Bretlandi. Browne vildi koma í veg fyrir að umfjöllun fjölmiðla næði inn fyrir svefnherbergisdyr hans, fór í mál við blaðið en tapaði og afréð því að hætta hjá BP. Á sama tíma sagði hann starfi sínu lausu hjá bandaríska fjárfestingarbankanum Goldman Sachs en þar hafði hann setið samhliða starfi sínu í forstjórastól BP.

Þrátt fyrir hrakfarir á síðustu árum sínum hjá BP þykir Browne með farsælli forstjórum í heimi en hann var hæstlaunaði forstjóri Bretlandseyja í forstjóratíð sinni hjá BP. Hann starfar nú sem stjórnarformaður bandaríska fjárfestingarfélagsins Apax Partners.

Samhliða uppsögninni hjá BP gaf Browne frá sérstaka aukagreiðslu upp á allt að tvo milljarða íslenskra króna auk kaupréttarsamnings. Þá átti hann sömuleiðis að fá jafnvirði rúmra 180 milljóna króna á yfirstandandi fjárhagsári í starfslokagreiðslur. Ekki er útlit fyrir að hann fái þær, í bili að minnsta kosti.