Horft í aðra átt

Breska tímaritið Economist segir allt stefna í stórfelldan samruna á bankamarkaði í Evrópu. Sé samruni breska bankans Barclays og hollenska bankans ABN Amro einungis forsmekkurinn að því sem koma skal. Bankarnir hafa átt í samrunaviðræðum í nokkrar vikur en lyktir náðust í málinu á mánudag þegar skrifað var undir samkomulag þess efnis að Barclays kaupi hollenska banka.

En fleiri sitja um ABN Amro, þar á meðal nokkrir bankar sem myndað hafa hóp undir forystu Royal Bank of Scotland. Segir Economist að vel geti farið svo að þeir fari í óvinveitt yfirtökuferli til að tryggja sér fjármálastofnunina.

Breskir sérfræðingar í efnahagsmálum gagnrýna peningamálastjórn Englandsbanka harðlega og kalla á stýrivaxtahækkun. Stýrivextir í Bretlandi eru 5,25 nú um stundir en peningamálanefnd bankans ákvað fyrr í mánuðinum að halda stýrivöxtum óbreyttum.

Verðbólga rauk hins vegar upp í 3,1 prósent í síðasta mánuði, langt umfram spár og hefur ekki verið hærri í áratug. Telegraph hefur eftir sérfræðingunum að bankinn hafi misst sjónar á því peningamagni sem sé í umferð. Verði hann að herða tökin og hækka vextina hraðar en áður var gert ráð fyrir á næstu mánuðum. Vilji þeir sjá þá í allt að 7,5 prósentum fyrir næsta haust.