Ryanair stofnar félag

Micheal O‘Leary, forstjóri írska lággjaldaflugfélagsins Ryanair, er sagður velta því alvarlega fyrir sér að stofna lággjaldaflugfélag sem muni sinna flugi á milli Evrópu og Bandaríkjanna á næsta ári. Ástæðan er samningur á milli Bandaríkjanna og Evrópusambandsins um auknar heimildir flugfélaga til að fljúga álfanna á milli.

Mörg flugfélög sjá fram á verðstríð á flugleiðunum og spá því að farmiðaverð yfir hafið muni hríðlækka í kjölfarið.

Breska fréttastofan Sky segir að flugfélagið sem O‘Leary íhugar að setja á laggirnar muni ekki fljúga undir merkjum Ryanair. Haft hefur verið eftir O‘Leary, að verðmiðinn geti farið allt niður í sjö pund, jafnvirði rétt rúmra 900 króna. Markaðsaðilar telja verðið alltof lágt.

Talsverð samkeppni liggur þegar í loftinu því annað breskt flugfélag, Zoom Airlines, hefur í bígerð að fljúga daglega á milli Gatwick og John F. Kenn-edy flugvallarins í New York þegar samningurinn tekur gildi á næsta ári.

Gert er ráð fyrir því að fyrstu vélar Zoom Airlines fari í loftið undir lok júní á næsta ári og mun farmiðaverð liggja í 129 pundum, tæpum 17 þúsund íslenskum krónum.