Búist við uppsögnum hjá Citigroup

Orðrómur er uppi um að bandaríski fjárfestingabankinn Citi­group, eitt stærsta fjármála­fyrirtæki heims, ætli ýmist að segja upp rúmlega 15.000 manns eða færa höfuðstöðvar bankans til að lækka kostnað. Breytingarnar eru sagðar liður í hagræðingaráformum bankans en horft er til þess að spara um einn milljarð bandaríkjadala, jafnvirði 67 milljarða íslenskra króna, með aðgerðunum.

Greint verður formlega frá endurskipulagningu fyrirtækisins formlega í næsta mánuði jafnhliða birtingu á ársfjórðungsuppgjöri bankans.

Chuck Prince, forstjóri Citi­group, er ennfremur sagður undir miklum þrýstingi frá hluthöfum bankans að draga úr rekstrarkostnaði. Slíkt er talið geta leitt til hærri arðgreiðslna til hluthafa.

Prince lét í desember í fyrra gera ítarlega skýrslu um útgjöld og rekstur bankans. Niðurstöður hennar verða birtar í næsta mánuði skömmu fyrir uppgjörið um miðjan apríl.

Viðskiptablaðið Financial Times segir að fastlega sé reiknað með viðamiklum uppsögnum. Fari svo að 15.000 manns verði sagt upp nemur það um fimm prósentum af starfsliði Citigroup, að sögn blaðsins.