Lengstu vefföngin 63 stafir

EURid, stofnunin sem sér um að skrá evrópsku .eu-vefföngin, hefur skráð sex vefföng sem fylla hámarkslengdina, 63 stafi. Þar á meðal eru fullt nafn velsks bæjar og fyrstu 63 tölustafirnir í óendanlegu tölunni pí.

Þýskur grallari skráði veffangið

www.thisisthelongesteuropeandomainnameallovertheworldandnowitismine.eu

og landi hans bæði www.aaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaa.eu og

www.zzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzzz.eu.

En velska þorpið, sem hefur heimsmetið í lengsta staðarnafninu, hefur netnotendum til hægðarauka boðið upp á stytta útgáfu af nafninu: www.llanfair.wales.com. Þeir sem vilja spreyta sig í réttritun geta hins vegar slegið inn hið fulla nafn:

www.llanfairpwllgwyngyllgogerychwyrndrobwllllantysiliogogogochuchaf.eu.

Þessi langa útgáfa kvað víst eiga við um efri hluta hins velskumælandi þorps á eynni Anglesey í Norður-Wales.

Frá því að opnað var fyrir skráningar á .eu-vefföngum 7. apríl í fyrra hafa meira en tvær og hálf milljón veffanga verið skráð, þar af ein milljón á fyrsta degi. Eftirsóttustu vefföngin eru sex.eu, hotel.eu, travel.eu og jobs.eu.

Íslenskir aðilar geta aðeins skráð .eu-veffang í gegnum milliliði í ESB-landi, þar sem ekki náðist samkomulag um að EFTA-löndin í EES fengju rétt til slíkra skráninga þótt þau væru hluti af innri markaði Evrópu.