Robert Tchenguiz flaggar í Sainsbury

Dótturfélag Tchenguiz Family Trust hefur eignast þriggja prósenta hlut í Sainsbury, þriðju stærstu stórmarkaðakeðju Bretlandseyja. Fyrir félaginu fer Robert Tchenguiz, verðandi stjórnarmaður í Existu og einn stærsti hluthafi þess félags.

Hlutabréf í Sainsbury fóru í hæsta gengi í níu ár um miðja síðustu viku þegar greint var frá þessum kaupum. Breska yfirtökunefndin hefur nú gefið fjárfestahópi undir forystu CVC og Blackstone sex vikna frest til að leggja fram tilboð í verslanakeðjuna eftir að stjórn Sainsbury óskaði eftir því að þrýst yrði á hópinn. Talið er að aðrir fjárfestar renni hýru augu til breska félagsins, þar á meðal Marks & Spencer, Asda, Apax og sjóður í eigu kúveiska ríkisins.

Íslenskir fjárfestar, eins og Baugur og Unity Investment, sem er í eigu Baugs, FL Group og Kevins Stanford, hafa tekið stöður í Sainsbury og hagnast á þeim viðskiptum.

Sérfræðingar telja að yfirtökutilboð verði að hljóða upp á 550 pens á hlut en gengi Sainsbury stóð í 524 pensum í Kauphöllinni í Lundúnum í gær.