Rafhlöður úr fartölvum innkallaðar á ný

8. mars 2007 06:00

Kínverski fartölvuframleiðandinn Lenovo hefur innkallað rúmlega 200.000 rafhlöður í fartölvum fyrirtækisins. MYND/AFP

Kínverski tölvuframleiðandinn Lenovo ákvað á fimmtudag í síðustu viku að innkalla rétt rúmlega 200.000 rafhlöður sem fylgja Thinkpad-fartölvum fyrirtækisins. Að sögn Lenovo hafa fimm tilkynningar borist um að rafhlöðurnar ofhitni. Hætta er á að kviknað geti í fartölvum af þessum sökum en einn eigandi Thinkpad-fartölvu er sagður hafa fundið til sviða í augum vegna reyks og gneistaflugs frá fartölvu hans þegar kviknaði í henni.

Að sögn forsvarsmanna Sanyo getur gallinn ekki komið upp í rafhlöðunum nema þegar þeim er skellt af afli í gólfið.

Fréttir af innköllun á rafhlöðum í fartölvum komust í hámæli seint á síðasta ári en þá sá japanska tæknifyrirtækið Sony sér ekki annað fært en að innkalla rúmlega níu milljónir rafhlaða vegna galla í fartölvurafhlöðum sem fyrirtækið framleiddi. Gallinn var af svipuðum toga og nú en rafhlöðurnar fylgdu fartölvum frá risafyrirtækjum á borð við Dell, Toshiba og Sony. Meira að segja Lenovo slapp ekki við skrekkinn og varð að innkalla um hálfa milljón fartölva vegna þessa. Sony varð fyrir talsverðum skakkaföllum og varð meðal annars að skera niður afkomutölur sínar vegna gríðarlegs kostnaðar við innköllunina.

Japanski raftækjaframleiðandinn Sanyo, sem er þriðji stærsti rafhlöðuframleiðandi í heimi, framleiddi rafhlöðurnar í samstarfi við Lenovo. Fyrirtækin ákváðu því um helgina að skipta kostnaðinum við innköllunina á milli sín. Ekkert liggur hins vegar enn fyrir um kostnað og áhrif innköllunarinnar. Fjölmiðlar eru þó á einu máli um að Lenovo verði fyrir óverulegum skaða.

Öðru máli gegnir um Sanyo en greinendur segja þetta enn eina hörmungarfréttina fyrir fyrirtækið. Síðastliðin ár hafa verið erfið fyrir Sanyo sem hefur kostað miklu til vegna endurskipulagningar í rekstri vegna samdráttar. Sanyo greindi frá afleitri afkomu á fjórða ársfjórðungi fyrir skömmu og er gert ráð fyrir að tæknifyrirtækið komi lítið skár undan fyrstu mánuðum þessa árs enda er gert ráð fyrir taprekstri þriðja árið í röð.

En þar með er ekki öll sagan sögð í sambandi við Sanyo því fyrirtækið er undir smásjá fjármálayfirvalda í Japan vegna gruns um að átt hafi verið við bókhald fyrirtækisins með það fyrir augum að láta afkomuna sýnast betri en raunin var.

Gengi bréfa í báðum fyrirtækjunum lækkaði nokkuð á markaði vegna innköllunarinnar, ekki síst í Sanyo sem fór niður um 2,7 prósent. Fyrirtækið má vart við meiru því gengi bréfa í japanska tæknifyrirtækinu hrapaði niður um heilt 21 prósent vegna rannsóknar á bókhaldi þess fyrir hálfum mánuði. Segja greinendur fyrirtækið því einkar viðkvæmt um þessar mundir.