Simbabve slær verðbólgumet

Verðbólgan í Afríkuríkinu Simbabve rauk í methæðir í síðasta mánuði þegar hún mældist 1.593,6 prósent á ársgrundvelli. Sé litið til hækkunar á milli mánaða jókst verðbólgan um 45,4 prósentustig frá því í desember. Að sögn hagstofu Simbabve munar mestu um hækkun á rafmagns-, gas- og öðru orkuverði milli mánaða.

Verðbólga er hvergi jafn mikil í dag og í Simbabve en hún stóð í um 1.200 prósentum um mitt síðasta sumar.

Breska ríkisútvarpið bendir á að ástandið í efnahags-málum sé ekki gott í Simbabve. Atvinnuleysi mælist um 80 prósent. Skortur á matvælum og eldsneyti er viðvarandi auk þess sem verð á læknisþjónustu, samgönguþáttum og annarri vöru hefur snarhækkað. Til að bæta gráu ofan á svart hafa læknar og hjúkrunarkonur landsins verið í allsherjarverkfalli í um mánuð. Fyrir skömmu bættust háskólakennarar í hópinn.

Stjórnarandstæðingar kenna Robert Mugabe, forseta landsins, sem haldið hefur um flesta stjórnartauma frá 1980, um ástandið. Mugabe, sem fyrir nokkrum árum rak hvíta bændur af jörðum sínum í Simbabve og tók þær eignarnámi, segir hins vegar Vesturlöndum um að kenna. Hafi þau lagt efnahag landsins í rúst með refsiaðgerðum sem þau beittu í mótmælaskyni við aðgerðir hans.