Hagnaður JJB Sports dregst saman

Sportvöruverslanakeðjan JJB Sports skilaði 38,3% minni hagnaði á fyrri hluta rekstrarársins en á sama tímabili í fyrra. Félagið, sem rekur 420 verslanir á Bretlandseyjum, hagnaðist um 11,2 milljónir punda fyrir skatta, sem svarar til 1,4 milljarða króna, samanborið við 18,2 milljónir punda árið 2006. JJB Sports er 30% í eigu Exista og forstjórans Chris Ronnie.

Fjallað er um málið í Hálf fimm fréttum Kaupþings banka. Þar segir m.a. að erfiðar markaðsaðstæður settu svip sinn á uppgjör félagsins en velta dróst saman um 4,3% milli ára. Það hafði sín áhrif að engin stórkeppni í fótbolta fór fram í sumar eins og í fyrra þegar HM var haldið í Þýskalandi, en allur varningur, sem tengist fótbolta á einn eða annan hátt, tekur jafnan mikinn sölukipp í kringum slíka atburði.

Uppgjörið er undir væntingum stjórnenda félagsins en fyrr í september gaf það út neikvæða afkomuviðvörun sem olli nærri 30% gengislækkun á skömmum tíma. Þeir reikna með að seinni hluti ársins, þar á meðal jólaverslunin, verði í takt við síðasta ár. Hlutabréf í JJB Sports höfðu hækkað um sex prósent í Kauphöllinni í Lundúnum í dag.

JJB Sports er sem fyrr segir 30% í eigu Exista og forstjórans Chris Ronnie. Hlutinn keyptu þeir í júní á 275 pens á hvern hlut fyrir um 16,3 milljarða króna á þeim tíma en gengið stendur nú í 154 pensum hlut. Nemur lækkunin því um 43% á þremur og hálfum mánuði..