Bestu leikmennirnir í NBA deildinni í körfubolta eru ekki á neinum sultarlaunum. Hér fyrir neðan er listi yfir 25 tekjuhæstu leikmenn í NBA í ár, en þessar tölur eru aðeins byggðar á launum þeirra frá félögum sínum.
Helstu stjörnur NBA deildarinnar eru flestar með risastóra auglýsingasamninga sem færa mörgum þeirra jafnvel svipaðar eða meiri tekjur en þeir hafa í laun hjá félögum sínum.
Það er Kevin Garnett hjá Boston Celtics sem er með hæstu launin í NBA í vetur, hátt í einn og hálfan milljarð. Meðallaun leikmanna í NBA deildinni eru í kring um 250 milljónir króna á ári um þessar mundir og heildartekjur og fríðindi allra leikmanna í deildinni eru komin ansi nálægt tveimur milljörðum dollara - eða 120 milljörðum króna.
Hér fyrir neðan er listi yfir 25 launahæstu leikmenn í NBA deildinni í milljónum króna. Vissulega eru skiptar skoðanir um það hverjir þeirra eru að vinna fyrir kaupinu sínu og hverjir ekki.
Þarna má sjá að Boston er að greiða ansi væna summu í laun til þríeykisins Kevin Garnett, Paul Pierce og Ray Allen, en þeir eru á meðal 17 launahæstu manna í deildinni. Þessar launagreiðslur falla þó eflaust ljúfar úr hendi Boston manna á miðað við það sem forráðamenn New York eru að punga út fyrir tvo af sínum leikmönnum.
Stephon Marbury hjá New York hefur verið gagnrýndur harðlega fyrir leik sinn og vandræði utan vallar það sem af er tímabili í vetur en félagið er samt að greiða honum og fyrrum félaga hans Steve Francis (sem nú er varaskeifa hjá Houston og fær ekkert að spila) rúmlega 2,1 milljarð króna í vetur.
# Leikmaður, Félag, Laun (í milljónum króna)
1. Kevin Garnett - Boston 1454
2. Michael Finley* - San Antonio 1254
3. Shaquille O'Neal - Miami Heat 1225
4. Jermaine O'Neal - Indiana 1208
4. Jason Kidd - New Jersey 1208
6. Kobe Bryant Los Angeles 1194
7. Tim Duncan - San Antonio 1165
7. Allen Iverson - Denver 1165
7. Stephon Marbury - New York 1165
10. Tracy McGrady - Houston 1118
11. Chris Webber+ - Samningslaus 1104
12. Baron Davis - Golden State 1007
12. Shawn Marion - Phoenix 1007
14. Dirk Nowitzki - Dallas 1003
14. Paul Pierce - Boston Celtics 1003
14. Antawn Jamison - Washington 1003
17. Ray Allen - Boston 980
18. Steve Francis* - Houston 964
19. Ben Wallace - Chicago 950
20. Elton Brand - LA Clippers 940
21. Rashard Lewis - Orlando Magic 912
22. Michael Redd - Milwaukee 890
23. Amare Stoudemire - Phoenix 843
23. Yao Ming - Houston 843
25. Andrei Kirilenko - Utah 841
25. Pau Gasol - Memphis 841
* Laun leikmanna frá félögum sem þeir léku með áður (Finley frá Dallas, Francis frá New York)
+ Philadelphia greiðir laun Webber
