Carter skoraði 45 stig

Vince Carter skoraði 45 stig, þar af 14 síðustu stig New Jersey Nets í sigri liðsins á Milwaukee í NBA körfuboltanum í nótt 89-85. Jason Kidd var einnig frábær í liði New Jersey og náði enn einni þrennunni með 12 stigum, 13 stoðsendingum og 12 fráköstum, en þetta var í 71. sæti sem Kidd nær þrennu á ferlinum.

Vince Carter skoraði 38 af 45 stigum sínum í síðari hálfleiknum, en New Jersey hafði ekki sigrað Milwaukee á útivelli síðan árið 2000. Bobby Simmons og Michael Redd skoruðu báðir 18 stig fyrir Milwaukee.

Cleveland lagði Orlando 105-92. LeBron James skoraði 26 stig fyrir Milwaukee, en Dwight Howard skoraði 23 stig og hirti 14 fráköst hjá Orlando.

Indiana vann auðveldan sigur á New Orleans 97-75, þar sem Danny Granger fór á kostum í liði Indiana og skoraði 22 stig og hirti 11 fráköst, en hann er nýliði liðsins. Nýliði New Orleans, Chris Paul, var að vanda góður og skoraði 27 stig í leiknum.

Washington lagði Minnesota 90-78. Gilbert Arenas skoraði 34 stig fyrir Washington en Ricky Davis skoraði 25 stig fyrir Minnesota.

Detroit vann Atlanta 97-87. Rip Hamilton skoraði 24 stig fyrir Detroit, Rasheed Wallace var með 21 stig og 12 fráköst, Chauncey Billups var með 19 stig og 15 stoðsendingar og Ben Wallace skoraði 9 stig, hirti 17 fráköst, varði 6 skot og stal 5 boltum. Al Harrington skoraði 20 stig og hirti 10 fráköst fyrir Atlanta.

Memphis lagði Toronto 94-88. Pau Gasol skoraði 21 stig fyrir Memphis, en Chris Bosh skoraði 26 stig fyrir Toronto.

Dallas vann 12. leikinn í röð á heimavelli þegar liðið skellti LA Clippers 93-91. Josh Howard skoraði 23 stig fyrir Dallas, en Elton Brand skoraði 20 fyrir Clippers.

San Antonio vann Seattle 103-78. Tony Parker skoraði 30 stig fyrir San Antonio, en Ray Allen skoraði 20 fyrir Seattle.

Denver vann Charlotte 100-84. Carmelo Anthony skoraði 24 stig fyrir Denver, en Raymond Felton skoraði 14 fyrir Charlotte.

Boston rúllaði yfir Utah á útivelli 103-83, en þetta var aðeins fimmti sigur Boston á útivelli í allan vetur. Paul Pierce skoraði 30 stig fyrir Boston, en Andrei Kirilenko skoraði 17 fyrir Utah.

LA Lakers lagði Portland 99-82. Kobe Bryant skoraði 27 stig fyrir Lakers en Juan Dixon skoraði 16 stig fyrir Portland.

Sacramento vann auðveldan sigur á Golden State 102-77. Mickael Pietrus skoraði 16 stig fyrir Golden State, en Brad Miller var stigahæstur með 17 stig hjá jöfnu liði Sacramento.