Örlögin geimferjanna ráðast í kvöld

Góðar líkur eru á að geimferjunni Discovery verði skotið á loft eftir rúma klukkustund. Ferðin er afar þýðingarmikil því hún gæti ráðið úrslitum um hvort þessir farkostir verði áfram notaðir til geimferða eða teknir úr umferð.

Starfsmenn Bandarísku geimferðastofnunarinnar NASA byrjuðu snemma í dag að telja niður fyrir geimskotið en áætlað er að það fari fram þegar klukkuna vantar 11 mínútur í átta að íslenskum tíma. Í gær voru veðurhorfurnar reyndar ekkert sérstaklega góðar en í morgun tók að létta þó nokkuð til yfir Canaveral-höfða og voru líkurnar á geimskoti þá sagðar 60 prósent. Lítilsháttar bilunar varð vart í útblástursbúnaði Discovery í morgun en tæknimenn náðu fljótlega að gera við hana. Áhöfn ferjunnar er skipuð sjö geimförum og þeir eiga að vinna að ýmis konar viðgerðum á alþjóðlegu geimstöðinni sem sveimar á sporbaug um jörðu, auk þess að flytja þangað birgðir. Þau verkefni eru þó ekki það sem beðið er eftir með mestri eftirvæntingu heldur einfaldlega hvort geimferjan komist klakklaust aftur til jarðar. Rúm þrjú ár eru liðin síðan Kólumbía, systurskip Discovery, fórst með allri áhöfn eftir að hitahlífar af eldsneytistanki skullu á henni og eyðilögðu vængbyrði hennar. Litlu munaði að á sama hátt færi fyrir Discovery í fyrrasumar og síðan þá hafa ferjurnar verið kyrrsettar. ef upp koma svipuð vandkvæði við þennan leiðangur er allt útlit fyrir að geimferjunum verði lagt fyrir fullt og allt. Fari svo verða Bandaríkjamenn að reiða sig á Rússa til að flytja vistir og búnað til geimstöðvarinnar.