Ekki að taka við Inter Milan

Fjölmiðlar á Ítalíu hafa gert því skóna undanfarna daga að Sven-Göran Eriksson muni verða næsti þjálfari Inter Milan ef Roberto Mancini nær ekki að koma liðinu á sigurbraut hið snarasta. Eriksson vísar þessu á bug og segist styðja fyrrum aðstoðarmann sinn hjá Lazio heilshugar.

"Það er eðlilegt að fjölmiðlar velti upp svona getgátum þegar illa gengur hjá liðinu, en enginn hefur sett sig í samband við mig um að taka við liðinu. Roberto var frábær leikmaður og stóð sig vel þegar hann vann með mér hjá Lazio og ég er viss um að hann nær að beina liðinu á rétta braut," sagði Eriksson.