Þjóðarhreinsun í uppsiglingu

Við mótmælum framferði Ísraelshers sem bitnar á hinum almenna íbúa, körlum, konum og ekki síst börnunum, sem reyna alltént að vera úti við leik, að minnsta kosti á meðan sprengjunum rignir ekki, segir Sveinn Rúnar Hauksson, formaður félagsins Ísland-Palestína, sem heldur mótmælafund á Austurvelli klukkan 17.30 í dag.

Ísraelsher réðist nýverið inn á Gaza-svæðið í þeim yfirlýsta tilgangi að frelsa hermann, sem skæruliðar handtóku 25. júní.

Síðan hefur einn ísraelskur hermaður og 60 Palestínumenn fallið, þar af fjölmörg börn og unglingar. Auk þess hafa nær tvö hundruð Palestínubúar særst.

Ísraelsher hefur rofið samgönguæðar og er svo með fáránlegar yfirlýsingar um að það eigi að hindra skæruliðahópa í að komast leiðar sinnar. Þeir sprengdu eina orkuver Gaza-strandarinnar sem sá 700 þúsund óbreyttum Palestínumönnum fyrir rafmagni og komu svo með þá fráleitu skýringu að þeir hefðu gert þetta svo skæruliðar sæju ekki til verka þegar þeir flyttu herflaugar. En slíkir hópar gera slíkt auðvitað í skjóli myrkurs, segir Sveinn Rúnar.

Þetta er bara málatilbúningur, þetta gengur allt út á einhver öfugmæli og hrein ósannindi þegar þeir halda því fram að aðgerðirnar eigi ekki að beinast gegn óbreyttum borgurum, eins og sendiherra Ísraels á Íslandi hélt fram á dögunum, bætir Sveinn Rúnar við og vitnar í viðtal Fréttablaðsins við Miryam Shomrat, sendiherra, sem birtist í síðasta mánuði.

Málið er sérlega alvarlegt þegar tillit er tekið til þess að vatnsdælur flestra íbúa eru knúðar áfram af rafmagni, sem nú er ófáanlegt á stórum hluta Gaza-strandarinnar.

Sveinn Rúnar, sem er læknir, hefur einnig miklar áhyggjur af eyðileggingu skolpræsa á svæðinu, því slíkt býður bara hættunni heim, og segir hann börn nú í mikilli smitsjúkdómahættu.

Það er um líf og dauða að tefla, það verður að rjúfa þessa einangrun sem Ísraelsstjórn hefur tekist að koma palestínsku þjóðinni í á herteknu svæðunum, segir Sveinn Rúnar.