Slá stóru dönsku bönkunum við

Minni bankar og sparisjóðir í Danmörku sýndu að jafnaði betri arðsemi en stóru fjármálafyrirtækin á fyrri hluta ársins og hafa verið að stela markaðshlutdeild og viðskiptavinum frá risunum. Frá þessu er greint í samantekt Jyllands-Posten, en hún nær til 70 prósenta danskra fjármálastofnana.

Jóski bankinn Ringkjøbing Landbobank sýndi hæstu arðsemi eiginfjár á fyrri hluta ársins eða um 42 prósent á ársgrundvelli samanborið við þrjátíu prósent árið áður. Í næstu sætum á eftir koma Sydbank (35 prósent), Amagerbanken (32 prósent), Totalbanken (29 prósent) og færeyski Sparikassinn (29 prósent).

Stóru bankarnir voru neðar. Jyske bank sýndi 24 prósenta arðsemi eigin fjár og Danske bank 23 prósenta.

Mikill vöxtur hefur verið í danska bankakerfinu á árinu líkt og því íslenska sem kemur að stærstum hluta til vegna mikils útlánavaxtar. Hefðbundinn bankarekstur skilar methagnaði en tap af fjárfestingum í hlutabréfum dró afkomuna niður.

Í umfjöllun blaðsins kemur einnig fram að smærri fjármálafyrirtæki hafi vaxið hratt frá því á tíunda áratugnum eftir að samþjöppun hófst hjá stærri bönkum. Á einum áratug hafi smærri bankar aukið fjölda útibúa um fjórðung á sama tíma og þeir stóru drógu saman seglin í þeim efnum sem lið í því að minnka kostnað.