Við vorum heppnir

Fabio Capello viðurkenndi fúslega að hans menn í Real Madrid hefðu haft heilladísirnar á sínu bandi í gær þegar þeir lögðu Valencia 1-0 á Mestalla í Valencia. Þetta var fyrsta tap liðsins á heimavelli í 13 mánuði, en Fabio Capello er greinilega að setja stimpil sinn á lið Real Madrid sem nú situr í þriðja sæti deildarinnar á eftir Barcelona og Sevilla.

Valencia yfirspilaði Real Madrid lengst af í leik liðanna í gær, en gulldrengurinn Raul skoraði hinsvegar eina mark leiksins og tryggði Madridarliðinu sigur í leik helgarinnar í spænska boltanum.

"Valencia lá á okkur í fyrri hálfleiknum og skapaði sér miklu fleiri færi en við, svo við vorum heppnir að ná að sigra. Það er mjög erfitt að vinna á Mestalla og það er alveg sama hvaða lið kemur hingað - það má þakka fyrir að sleppa héðan lifandi," sagði Capello eftir leikinn í gærkvöld.