Ofmátu afkomu Bang & Olufsen

Hagnaður danska raftækjaframleiðandans Bang & Olufsen nam 431 milljón danskra króna eða jafnvirði rúmra 5,2 milljarða íslenskra króna fyrir skatta á síðasta ári. Danska dagblaðið Börsen segir hagnaðinn nítján milljónum dönskum krónum, eða rétt rúmum 230 milljónum íslenskum krónum, minni en greiningaraðilar höfðu spáð. Afkoman er í takt við væntingar fyrirtækisins.

Velta raftækjaframleiðandans nam 4,23 milljörðum danskra króna, eða eða rúmum 51 milljarði íslenskra króna, sem er hundrað milljónum, eða um 1,2 milljörðum íslenskra króna, meiri en búist hafði verið við.

Reiknað er með að velta Bang & Olufsen muni aukast um átta til tíu prósent á þessu ári en veltan jókst um fjórtán til tuttugu prósent í Bretlandi, Hollandi og í Belgíu á síðasta ári.

Þá spá greiningaraðilar því að Bang & Olufsen skili um 521 milljón danskra króna, rúmum 6,3 milljörðum íslenskra króna, í hagnað fyrir skatta á þessu ári en það er nokkuð yfir spá fyrirtækisins.

Gengi bréfa í félaginu lækkaði um þrjú prósent á markaði í Danmörku í gær vegna fréttanna. FL Group á 10,5 prósent í Bang & Olufsen og var markaðsvirði hlutarins í lok júní rúmir 11,8 milljarðar íslenskra króna.