Schumacher launahæstur þrátt fyrir að vera hættur

Umboðsmaður þýska ökuþórsins Michael Schumacher fullyrðir í samtali við þýska blaðið Bild, að Schumacher muni hala inn meiri tekjur en helstu keppinautar hans Kimi Raikkönen og Fernando Alonso á næsta ári - þó hann setjist aldrei upp í bíl.

Schumacher er sem kunnugt er að hætta að loknu yfirstandandi tímabili, en umboðsmaður hans Willi Webber segir að markmið sitt sé að gera Schumacher að keisara í auglýsingabransanum.

Schumacher auglýsir fyrir vöruframleiðanda á borð við DVAG, Shell og Omega, en þessir aðilar hafa þegar framlengt samninga sína við ökuþórinn sem keppnir í síðasta sinn í Kína í næsta mánuði.

Því er haldið fram að tekjur Schumacher á næsta ári verði í kring um 26 milljónir dollara og fari því fram úr Kimi Raikkönen, Fernando Alonso og bróður sínum Ralf Schumacher.

Michael Schumacher er einn auðugasti íþróttamaður í heimi og talið er að eignir hans nemi um 800 milljónum dollara, eða í kring um 56 milljarða íslenskra króna.