Dæmdur fyrir að stela bílum

Rúmlega þrítugur karlmaður var í morgun dæmdur í fimm mánaða skilorðsbundið fangelsi fyrir að ræna tveimur bílum og keyra þá um götur Reykjavíkur uns lögregla stöðvaði för hans. Maðurinn var jafnframt ökuréttindalaus þegar þetta gerðist. Maðurinn hefur fimm sinnum verið dæmdur til sektargreiðslu vegna umferðarlaga- og fíkniefnabrota auk þess sem hann hefur tvo skilorðsbundna fangelsisdóma á bakinu fyrir skjalafals og þjófnað. Þrátt fyrir að hafa tvívegis brotið gegn skilorði var fangelsisdómur yfir manninum gerður skilorðsbundinn en dómari gerði honum sérstaklega grein fyrir afleiðingum þess að brjóta skilorð í framtíðinni.