The Shins á Airwaves

Erlendu sveitirnar The Shins, Radio 4, Keane, The Stills, Kid Koala og Magnet hafa allar tilkynnt þátttöku sína á Iceland Airwaves-tónleikahátíðinni sem haldin verður í sjötta sinn dagana 20.-24. október. Búist er við því að um tvær til fjórar erlendar sveitir bætist við. Ekki er óhugsandi að um stór nöfn verði þar að ræða. Radio 4 kemur frá New York og er hluti af elektróclash-stefnunni nýju sem blandar saman áhrifum sveita á borð við The Clash við lágstemmda raftónlist. The Stills koma frá Kanada og leika nýbylgjurokk sem svipar til New Order, Coldplay og The Cure. Breska sveitin Keane gaf nýverið út frumraun sína og þykir með efnilegri sveitum í heimalandinu. Kid Koala býður gestum svo upp á kanadískt hiphop sem hann sýður saman á þrjá plötuspilara. Magnet er frá Noregi og leikur ljúft rokk, sem smellpassar við íslenska skammdegið. The Shins er svo rúsínan í pylsuendanum. Glaðleg nýbylgja frá Bandaríkjunum sem hefur heillað tónlistaráhugamenn um allan heim. Þegar er búið að bóka fjölda íslenskra sveita en reiknað er með að pláss sé fyrir um 20 til viðbótar. Þeir flytjendur sem þegar hafa staðfest þátttöku sína eru Brain Police, Ghostigital, Eivör Pálsdóttir, Jagúar, Maus, Dikta, Skytturnar, Botnleðja, Singapore Sling, Trabant, Tenderfoot, Vinyl, Manhattan, O.N.E, Nilfisk, Lára, Mugison, Hudson Wayne, Úlpa, Kimono, Mínus, Leaves, Jan Mayen, Solid I.V., Ensími, Ske og 200.000 naglbítar. Eins og í fyrra verður hátíðin eingöngu haldin í miðborginni. Það fyrirkomulag þótti henta sérstaklega vel bæði fyrir tónlistarfólkið og gesti.