Framkallar múgæsing

Breski plötusnúðurinn John Digweed fær það hlutverk að skemmta gestum Nasa í kvöld. Þeir sem fylgjast grannt með teknótónlist þekkja kappann enda heimsfrægur plötusnúður. "Það má segja að hann hafi skotist upp á stjörnuhiminn með Sasha í kringum 1993 þegar þeir spiluðu á Renaissance kvöldunum frægu í London," segir Helgi Már Bjarnarson, annar umsjónamaður PartyZone útvarpsþáttanna. "Þeir urðu fljótt þekktustu plötusnúðar Bretland og hafa haldið þeim heiðri síðan. Báðir eru þeir ekki bara plötusnúðar heldur líka tónlistarmenn. Digweed hefur gefið út tónlist undir nafninu Bedrock en Sasha er líklegast öllu þekktari vegna þess að hann notar sama nafn í öllu sem hann gerir." Síðustu árin hefur John Digweed nær alltaf verið á árlegum topp 5 lista yfir bestu plötusnúðanna í tímaritinu DJ. Hann nýtur sérstakrar virðingar meðal annara plötusnúða enda þykir hann hafa sérstöðu í því hvernig hann vinnur mixin sín tæknilega og tónlistarlega. "Hann er þekktur fyrir að spila mikið fyrir massann, á stórum skemmtistöðum og tónlistarhátíðum. Hann er sérstaklega laginn í því að ná upp múgæsing með þéttri tónlist. Hann er ekki mikið í grúskrarapælingum, kannski ekki poppaður en hann spilar aðgengilega tónlist. Markmið hans er að ná fólkinu í brjálæði." Sem Bedrock hefur Digweed náð inn á topp 40 listann í Bretlandi með lögin Heaven Scent og For What You Dream of sem var notað í kvikmyndinni Trainspotting. Síðast þegar PartyZone stóð fyrir slíkri uppákomu fór ekki sem skildi. Sasha missti af flugvélinni og ekki var hægt að gera gestum það ljóst, fyrr en Nasa var orðið stútfullt af spenntum gestum sem voru komnir í danspósurnar. "Hann lendir klukkan þrjú og er bókaður í viðtali á útvarpsstöðvunum," segir Helgi. "Þannig getur fólk vitað að hann sé mættur. Við ætlum ekki að láta þetta endurtaka sig, þetta var algjört klúður." Sasha hefur svo verið endurbókaður og mun spila á Nasa 1. ágúst næstkomandi.