Hátækni er hálf stóriðjan

Samtök iðnaðarins telja að útflutningsverðmæti hátæknivöru verði yfir 21 milljarður króna í ár. Mikill vöxtur hefur verið í þessum þætti útflutningstekna á síðustu árum og eru gjaldeyristekjurnar nú komnar upp í helming af því sem þjóðarbúið fær fyrir útflutning á vörum úr stóriðju. Hins vegar er verðmætasköpunin í hátækniiðnaði meiri en í áliðnaði og járnblendi. Þetta helgast af því að þótt útflutningstekjur séu miklar úr stóriðju þá þarf líka að kaupa aðföng frá útlöndum. Tölur frá 2002 sýna að verðmætasköpun í stóriðjum nam 1,3 prósent af vergri landsframleiðslu en verðmætasköpun í lyfja- og lækningatækjageirunum nam 1,4 prósent af landsframleiðslu. Þorsteinn Þorgeirsson, hagfræðingur hjá Samtökum iðnaðarins, telur að þetta hlutfall hafi hækkað á síðustu árum. Samkvæmt spá Samtaka iðnaðarins verða útflutningstekjur í hátæknigeiranum 12,5 prósent af heildarútflutningstekjum þjóðarbúsins á þessu ári. Þorsteinn segir Samtök iðnarins leggja mikla áherslu á að búið sé vel að hátækniiðnaðinum. "Það sem við höfum verið að leggja áherslu á er það að hátæknigreinarnar skapa innlend verðmæti, þær skapa hátekjustörf og til að blómstra þurfa þessar greinar stöðug rekstrarskilyrði. Þá erum við að tala um vaxtastig sem er svipað og erlendis og stöðugt gengi. Þannig getum við búið til aðstæður þar sem þau sjá sér fært að halda áfram að starfa hér á landi í stað þess að auka starfsemina í útlöndum," segir Þorsteinn. Hann segir að Íslendingar græði mjög á rekstri hátæknifyrirtækja auk þess sem hálaunasvæði eins og Ísland eigi besta möguleika á að standast alþjóðlega samkeppni með aukinni áherslu á iðnað þar sem mannauður er mikilvægur og menntunarstig hátt. Þrátt fyrir þetta segir Þorsteinn að ekkert sé við það að athuga að stjórnvöld leggi áherslu á stóriðju. " Það er gæfuspor líka," segir hann. Hins vegar hefur Þorsteinn nokkrar efasemdir um hvort rekstrarskilyrði verði nægilega stöðug á næstu misserum. "Hagstjórnin þarf að vera vandanum vaxin. Það þarf að vera þjóðarsátt um það að það sé ekki verið að spenna upp þjóðfélagið með mikilli útgjaldaaukningu eða ótímabærri skattalækkun," segir hann.