Vill meiri sektarheimildir

Fjármálaeftirlitið tók til athugunar níu mál vegna hugsanlegra innherjasvika frá miðju ári 2003 til sama tíma í ár. Þar á meðal voru mál sem beindust að mörgum aðilum tiltekinna viðskipta. Ríkislögreglustjóra hefur verið gerð grein fyrir einu þessara mála. Þetta er meðal þess sem kemur fram í ársskýrslu Fjármálaeftirlitisins. Páll Gunnar Pálsson, forstjóri Fjármálaeftirlitsins, telur tímabært að taka til alvarlegrar umræðu hvort opna eigi fyrir það að ljúka innherjasvikamálum með stjórnvaldssektum. Fjármálaeftirlitið beitti slíkum sektum í tíu tilvikum á mál þar sem láðst hafði að tilkynna regluverði um fyrirhuguð verðbréfaviðskipti. Í einu máli var slíkum sektum beitt vegna þess að láðist að tilkynna um innherjaviðskipti til Kauphallarinnar. Páll Gunnar segir reynsluna af beitingu sektanna á þessa þætti hafa verið góða og skilað miklum árangri. "Líklegt er til dæmis að draga muni verulega úr viðskiptum fruminnherja skömmu fyrir birtingu uppgjöra." Páll ítrekar einnig vilja eftirlitsins til meira gagnsæis og að Fjármálaeftirlitið fái auknar heimildir til að greina frá niðurstöðum athugana sem byggja á lögum um verðbréfaviðskipti. Þennan vilja hefur Fjármálaeftirlitið birt í umræðuskjali. Fjármálaeftirlitið telur líklegt að heimildir þess til að tjá sig um niðurstöðu mála verði veittar í frumvarpi til nýrra laga um verðbréfaviðskipti. Með þessu ætti að skapast aukið aðhald á markaðinn, eins og raunin hefur verið með tilkynningar innherja um viðskipti með hlutabréf. Fjármálaeftirlitið hyggst leggja áherslu á að starfsemi á fjármálamarkaði sé í samræmi við eðlilega og heilbrigða viðskiptahætti. Þá hyggst Fjármálaeftirlitið beita sér fyrir setningu tilmæla um þátttöku fjármálafyrirtækja í atvinnurekstri. Páll Gunnar segir það áhyggjuefni hversu víða eignatengsl sé að finna á íslenskum verðbréfamarkaði, ekki síst með aðild fjármálafyrirtækja.