Lögsóttir fyrir ólöglega dreifingu

Alþjóðasamtök hljómplötuframleiðenda munu lögsækja tuttugu og fjóra einstaklinga í Danmörku fyrir ólöglega dreifingu á tónlist á netinu. Samtökin segja þetta lið í aðgerð um alla Evrópu og að einstaklingar í Bretlandi, Frakklandi og Svíþjóð megi búast við lögsóknum á næstunni. Tónlistariðnaðurinn hefur nú þegar lögsótt tæplega þrjú þúsund manns í Bandaríkjunum og meira en tvö hundruð einstaklinga í Danmörku, Þýskalandi, Ítalíu og Kanada. Ólöglegri dreifingu tónlistar á netinu er kennt um minnkandi sölu tónlistar í heiminum. Tuttugu og þriggja ára maður í Þýskalandi var á dögunum fundinn sekur og hafði sá sex þúsund lög á tölvu sinni. Hann var dæmdur til að greiða rúmar sjö hundruð þúsund krónur í sekt.