Sportveiðar á sel við Ísland

Auðugir bandarískir skotveiðimenn hafa áhuga á að koma hingað til lands og fá að stunda sportveiðar á sel gegn góðum greiðslum, en hingaðtil hefur hið opinbera greitt mönnum fyrir að skjóta sel. Vitað er um tvo eða þrjá Bandaríkjamen sem komið hafa hingað í þessum tilgangi og sækjast þeir helst eftir stórum útsels-brimlum. Síðan láta þeir stoppa upp hausana og jafnvel súta skinnin. Ekki er vitað hvort einhver samvinna sé að nást um að rækta upp þessa nýju möguleika i ferðamennsku, enda hefur hver bóndi á sjávarjörðum einkarétt á selveiðum út af jörð sinni, en utan þeirrar landhelgi er öllum heimilt að skjóta seli. Hér við land eru um 150 útselskópar skotnir árlega og greiðir Hringormanefnd fjögur þúsund krónur fyrir stykkið. Auk þess eru 200 til 300 eins árs og eldri útselir skotnir á ári. Fyrir þá eru greiddar 50 krónur fyrir kílóið, en meðal dýr vegur um 200 kíló. Auk þess eru greiddar þrjú þúsund krónur fyrir hvern neðrikjálka , sem veiðimenn skila inn til aldursgreiningar. Árlegur kostnaður hleypur því á býsna mörgum milljónum króna og eftir nokkru að slægjast að snúa því við og hafa af þessu tekjur í staðinn. Eftir því sem næst verður komist hefur þessi möguleiki ekki verið kynntur erlendis þótt sitthvað sé að gerast á þessu sviði eins og til dæmis í Noregi. Norska stórþingið hefur nú lagt blessun sína yfir þá hugmynd að selja ríkum útlendingum skotveiðileyfi á sel og gera selveiðarnar þannig að sportveiði, líkt og hreindýraveiðina hér á landi. Að sögn Aftenposten hafa útlendingar, einkum Þjóðverjar, sýnt mikinn áhuga á þessu, en leyfilegt er að skjóta tvö þúsund seli við Noregsstrendur á ári. Skyndileg hugarfarsbreyting hefur orðið í Noregi því þegar Svein Ludvigsen sjávarútvegsráðherra hreyfði við þessari hugmynd fyrir aðeins þremur árum, hlaut hann bágt fyrir og þótti hugmyndin fáránleg.