Framboðið lækkar markaðinn

Aukið framboð hlutabréfa er líklegasta ástæða lækkana hlutabréfamarkaðar að mati greiningardeildar Landsbankans. Þegar hefur verið gefið út nýtt hlutafé fyrir 121 milljarð króna á markaði og sé gert ráð fyrir sölu Símans má búast við að framboð nýs hlutafjár á næstunni verði tæpir 158 milljarðar króna. Alls mun því framboð nýs hlutafjár verða yfir 270 milljarðar króna. "Við höfum eins og aðrar greiningardeildir talið hlutabréfaverð hátt," segir Bjarki Logason, sérfræðingur hjá greiningardeild Landsbankans. "Hins vegar hefur mikil eftirspurn ýtt undir hækkanir og með auknu framboði nýs hlutafjár aukast líkur á lækkun." Greiningardeildin telur að há verðlagning markaðarins sé meira áhyggjuefni en áður. Sú ávöxtun sem fjárfestar geti búist við af markaðnum næsta árið miðað við rekstur fyrirtækjanna sé neikvæð um rúm fjórtán prósent. Þessi tala er fundin með því að meta verð fyrirtækjanna að ári með greiningu á sjóðstreymi og meta það miðað við núverandi verð hlutabréfa.