Baldur tekur áskorun

Baldur Ágústsson, forsetaframbjóðandi, ber bæði hag eldri borgara sem og þeirra sem erfa munu land fyrir brjósti og í kvöld ætlar hann að tala til ungu kynslóðarinnar þegar hann mætir í þáttinn 70 mínútur á PoppTíví. Þeir sem hafa fylgst með þessum líflega þætti þeirra Auðuns Blöndal, Sveppa og Péturs Jóhanns Sigfússonar vita að það er ekki heiglum hent að heimsækja strákana í settið en þaðan fer enginn út án þess að drekka ógeðsdrykkinn fræga og taka háskalegri áskorun. Baldur lætur þetta þó ekki aftra sér og sjálfsagt eru nokkur atkvæði í pottinum fyrir frambjóðanda sem þorir að kasta af sér helgislepjunni og skella í sig viðbjóðslegu bruggi strákanna. Þá má Baldur búast við öðruvísi og krefjandi spurningum sem hann þyrfti ekki að svara á nokkrum öðrum fjölmiðli. Þetta útspil Baldurs hlýtur því að teljast hressileg tilbreyting í dauflegri kosningabaráttunni en lítil hætta er á að sitjandi forseti Ólafur Ragnar Grímsson feti í fótspor Baldurs enda benda skoðanakannanir til þess að staða hans sé svo sterk að hann þurfi ekki að kyngja hverju sem er fyrir atkvæði MTV kynslóðarinnar.