Fréttir
Sextugir fíkniefnasalar í Kópavogi
Lögreglan í Kópavogi fann fíkniefni á tveimur mönnum á sextugsaldri, sem voru saman í bíl í gærkvöldi. Í framhaldi af því var gerð húsleit hjá öðrum þeirra og fannst þá meira.
Prófkjörskostnaður var 2.615 krónur
Paul Nikolov, frambjóðandi Vinstrihreyfingarinnar - Græns framboðs, birti í gær uppgjör sitt vegna framboðs í forvali Vinstri - Grænna í Reykjavík og í Kraganum um liðna helgi. Heildarreikningur Nikolov er tvö þúsund sex hundruð og fimmtán krónur,og þá er með talið frímerkið á prófkjörstilkynninguna og hlýtur prófkjörskostnaðurinn að vera lægsti sem um getur.
Jólatré sett upp við hlið Coliseum
Íbúum Rómarborgar var komið skemmtilega á óvart í gær en borgaryfirvöld höfðu þá komið jólatréi fyrir við hliðina á hinu fornfræga hringleikahúsi Coliseum.
Ölvaður ökumaður í þingholtum
Ölvaður ökumaður, sem lögreglan ætlaði að stöðva í Lækjargötu í nótt, gaf allt í botn og reyndi að stinga lögregluna af með þvi að aka upp í þingholtin. Þar stöðvaði hann bílinn og tók til fótanna, en lögreglumenn hlupu hann uppi.
Nýtt parhús reist í Grímsey
Hreppsnefndin í Grímsey fær afhent nýtt parhús um helgina sem ákveðið var að byggja í vor. Að sögn oddvita Grímseyjarhrepps, Brynjólfs Árnasonar, er þetta fyrsta sinn í 6 ár sem smiðshöggið er rekið á nýbyggingu í eynni.
Bílvelta norðan við Jökuldal
Lítil meiðsl urðu á ökumanni og farþega fólksbíls sem valt einn hring í mjúkum snjó á Háreksstaðaleið, norðan við Jökuldal í gærkvöldi. Lögregla dró bílinn upp á veginn og var hann keyrður á leiðarenda áfallalaust eftir það.
Köngulóarmaðurinn í Mexíkó
Lögreglumenn í Mexíkóborg handtóku í gær mann sem hafði klifið eina af hæstu byggingum borgarinnar í leyfisleysi. Maðurinn sem um ræðir heitir Alain Robert og gengur jafnan undir nafninu Köngulóarmaðurinn þar sem hann klífur byggingar án nokkurs öryggisbúnaðar.
Jón Ásgeir áhrifamikill í breskum tískuheimi.
Jón Ásgeir Jóhannesson er annar áhrifamesti maðurinn í breskum tískuiðnaði samkvæmt breska tískutímaritinu Drapers Fashion Magazine en blaðið tekur árlega saman lista yfir hundrað áhrifamesta fólkið í tískuiðnaðinum á Bretlandi.
Litvinenko jarðaður
Alexander Litvinenko, fyrrum rússneskur njósnari sem var myrtur í nóvember, var jarðsettur í gær. Milljarðamæringar, gagnrýnendur rússneskra stjórnvalda og tétenskir uppreisnarmenn söfnuðust saman til þess að fylgja Litvinenko til grafar en hann var grafinn í sama kirkjugarði og upphafsmaður kommúnismans, Karl Marx.
Fasteignasalar sviptir réttindum
Níu fasteignasalar hafa verið sviptir réttindum tímabundið, í tólf vikur hver. Morgunblaðið hefur það eftir Þorsteini Einarssyni formanni eftirlitsnefndar Félags fasteignasala, að þeir hafi ekki með fullnægjandi hætti skilað yfirlýsingum frá endurskoðendum í ágúst síðastliðnum, um fjárvörslu á síðustu tólf mánuðum.
Evrópusambandið hafnar tilboði Tyrkja
Evrópusambandið hefur hafnað tilboði Tyrkja um að opna eina höfn og einn flugvöll fyrir umferð til og frá Kýpur. Tyrknesk stjórnvöld lögðu tilboðið fram í þeirri von að það myndi liðka fyrir inngöngu Tyrklands í Evrópusambandið, en aðildarviðræðum var nýlega hætt og þá meðal annars vegna afstöðu Tyrkja til Kýpur.
Ungir ökuníðingar missa bílprófin
Þrír sautján ára piltar, með glæný ökuskírteini, voru teknir úr umferð í nótt eftir að hafa mælst á allt of miklum hraða. Tveir voru stöðvaðir á Reykjanesbraut, annar með sex daga gamalt bílpróf og hinn með tíu daga, og sá þriðji mældist á rúmlega 150 kílómetra hraða á Sæbraut, þar sem hámarkshraði er 60 kílómetrar á klukkustund.
Skautasvell opnað á Ingólfstorgi
Á torgum stórborga víða um heim eru skautasvell órjúfanlegur þáttur af jólastemningunni og í ár eru íslendingar engir eftirbátar New York-borgar eða Parísar. Í tilefni af 50 ára afmæli Tryggingamiðstöðvarinnar leigir fyrirtækið svellið frá Austurríki, en það þekur tvo þriðju Ingólfstorgs. Óskar Magnússon forstjóri fyrirtækisins og Vilhjálmur Vilhjálmsson borgarstjóri opnuðu svellið við hátíðlega athöfn í dag og tókust svo á í krullu að því loknu.
Án auglýsinga yrði engin Rás 2
Útvarpsstjóri telur sér ekki sætt í starfi ef frumvarp um hlutafélagavæðingu RÚV verður ekki samþykkt á vormánuðum. Afgreiðslu frumvarpsins hefur nú verið frestað fram á vorþing. Í morgun hófst á Alþingi önnur umræða um málefni Ríkisútvarpsins, en ákveðið hefur verið að fresta þriðju umræðu um Ríkisútvarpið ohf þar til í janúar. Frumvarpið verður sent til umræðu menntamálanefndar í millitíðinni.
Olíusamráðsdómur ekki fordæmi
Sýknudómur í gær, þar sem Essó er sýknað af skaðabótakröfu einstaklings vegna samráðs olíufélaganna, hefur ekki frodæmisgildi gagnvart bótakröfum Reykjavíkurborgar. Þetta segir Vilhjálmur Vilhjálmsson lögmaður sem rekur málið fyrir borgina.
Líf á Mars?
Vísindamenn hafa fundið merki um rennandi vatn á Mars. Uppgötvunin eykur verulega líkur á að líf sé að finna á rauðu plánetunni enda er vatn ein af höfuðforsendum þess.
Ritstjóri Kompáss sektaður
Lögreglustjórinn hefur sektað ritstjóra fréttaskýringaþáttarins Kompáss um fimmtíu og fjögur þúsund krónur fyrir vörslu fíkniefna. Þetta voru fíkniefni sem Kompás lét kaupa til að sýna auðvelt aðgengi barna að þeim en þau voru síðan afhent lögreglu með formlegum hætti.
Finnst rjúpan best
Vegfarendur ráku upp stór augu í gær þegar fálki steypti sér niður á Lækjartorgi, fyrir framan Héraðsdóm Reykjavíkur. Þrátt fyrir að komið væri ansi nærri, fór hann hvergi þar sem hann gæddi sér á hettumáfi. Guðmundur A Guðmundsson fuglafræðingur hjá Náttúrufræðistofnun segir ekki vera óalgengt að fálkar leiti matar í byggð þegar rjúpnastofnsinn er rýr eins og kom í ljós eftir rjúpnaveiðitímabilið, en óvenjufáar rjúpur veiddust í ár.
Bandarískar hleranir á íslandi
Skjalfestar sannanir liggja fyrir um að bandarísk yfirvöld blönduðust með beinum hætti í hleranir íslenskra stjórnvalda á eigin þegnum á tímum kalda stríðsins. Utanríkisráðuneytið tregðast við að opinbera þessi skjöl og bíður eftir heimild eða leiðbeiningum frá Bandaríkjunum
Óttast að tugmilljónir séu tapaðar
Óvissa ríkir um sölu á íslenskum landbúnaðarvörum í Bandaríkjunum eftir að verslanakeðjan Whole Foods, sem er sú stærsta í heiminum á sínu sviði, ákvað að hætta markaðssetningu á þeim vegna hvalveiða Íslendinga í atvinnuskyni. Tugmilljónir króna eru farnar í súginn segir forstjóri matvælafyrirtækisins Norðlenska.
Grunaður um að hafa aftur nauðgað
Maður á sextugsaldri situr í gæsluvarðhaldi grunaður um að hafa nauðgað konu á föstudag. Í október var sami maður dæmdur í fimm ára fangelsi fyrir hrottfengið ofbeldi og nauðganir.
Um hundrað merktir í tölvukerfi vegna bakteríunnar
Svokölluð Mosa-baktería hefur ekki fundist í þeim sýnum sem hafa verið rannsökuð á Landsspítalanum eftir að hún greindist í sjúklingi á þriðjudag. Búið er að rannsaka um helming sýnanna. Þeir sem eitt sinn hafa greinst með bakteríuna fara ávallt í einangrun við komu á sjúkrahús en um hundrað manns eru þannig merktir í kerfi Landsspítalans.
Kaupþing spáir einni breytingu á Úrvalsvísitölunni
Greiningardeild Kaupþings gerir ráð fyrir óbreyttri skipan 15 stærstu fyrirtækja í Úrvalsvísitölu Kauphallar Íslands á fyrri helmingi næsta árs. Einu breytinguna segir deildin vera þá að Atlantic Petroleum muni víkja fyrir Icelandic Group.
Jöklabréf halda uppi gengi krónunnar
Mikil styrking krónunnar á seinni hluta síðasta árs og auknar gengissveiflur á þessu ári hafa verið settar í samband við útgáfur jöklabréfa. Greiningardeild Landsbankans segir jöklabréfaútgáfuna hafa skilað verulega neikvæðri ávöxtun það sem af er árs.
Stýrivextir hækka á evrusvæðinu
Evrópski seðlabankinn ákvað í dag að hækka stýrivexti bankans um 25 punkta og verða stýrivextir á evrusvæðinu eftirleiðis 3,5 prósent. Þetta er sjötta stýrivaxtahækkun bankans á árinu til að stemma stigu við aukinni verðbólgu á evrusvæðinu.
Óbreyttir stýrivextir í Bretlandi
Englandsbanki greindi frá því í dag að ákveðið hefði verið að halda stýrivöxtum óbreyttum í 5 prósentum. Greinendur bjuggust almennt við þessari ákvörðun.
Það er vont, en það venst
Frumvarpi um málefni RUV ohf. hefur verið frestað á Alþingi og er nú ljóst að ekki verður af afgreiðslu þess fyrr en á vorþingi. Það er vont, en það venst, segir útvarpsstjóri um áframhaldandi óvissu varðandi málefni stofnunarinnar. Í morgun hófst á Alþingi önnur umræða um málefni Ríkisútvarpsins, en ákveðið hefur verið að fresta þriðju umræðu þessa umdeilda frumvarps þar til í janúar.
Múslimaráð Sómalíu hafnar þátttöku friðargæsluliða
Múslimaráðið sem ræður ríkjum í stórum hluta Sómalíu hefur hafnað því að Sameinuðu þjóðirnar sendi þangað friðargæslulið og segjast ætla að berjast gegn því af öllu afli ef til þess kemur.
Olíubirgðir jukust í Bandaríkjunum
Greiningardeild Glitnis segir aukna eftirspurn eftir olíu í Bandaríkjunum ásamt ágiskunum manna um að OPEC ríkin samþykki að minnka framleiðslu á fundi sínum þann 14. desember hafa valdið lítilsháttar hækkun á olíumarkaði undanfarna daga.
Ísraelar hafa ekki áhyggjur af skýrslu Íraksnefndarinnar
Forsætisráðherra Ísraels, Ehud Olmert, útilokaði í dag viðræður við Sýrland í náinni framtíð og bjóst hann heldur ekki við því að verða var við aukinn þrýsting frá Bandaríkjunum þess efnis þrátt fyrir skýrslu Íraksnefndarinnar sem kom út í gær en hún bendir á að ef einhver árangur á að nást í friðarumleitunum í Mið-Austurlöndum verði að huga að málefnum Ísraels.
Mest lesið
