Hannes Frímann tekur við eignastýringu Kviku banka

Hannes Frímann Hrólfsson, forstjóri Virðingar, verður næsti framkvæmdastjóri eignastýringar Kviku banka.

Tekur hann við starfinu af Sigurði Hannessyni, sem hætti störfum hja Kviku í síðasta mánuði, þegar sameining Virðingar og Kviku gengur í gegn síðar á árinu, samkvæmt heimildum Vísis.

Sigurður lét af störfum í bankanum í lok síðasta mánaðar samhliða því að hann var ráðinn nýr framkvæmdastjóri Samtaka iðnaðarins. Hannes hefur verið forstjóri Virðingar (áður Auður Capital) frá 2013. Þá var Hannes meðal annars áður aðstoðarframkvæmdastjóri markaðsviðskipta Kaupþings banka.

Talsvert hefur verið um breytingar á meðal helstu stjórnenda Kviku banka að undanförnu. Þann 27. apríl síðastliðinn var greint frá því að Sigurður Atli Jónsson hefði ákveðið að láta af störfum hjá bankanum. Síðar sama dag upplýsti Vísir að Ármann Þorvaldsson, þáverandi framkvæmdastjóri fyrirtækjaráðgjafar Virðingar og fyrrverandi framkvæmdastjóri Kaupþings Singer & Friedlander í Bretlandi, myndi taka við af Sigurði Atla. Það var síðan staðfest með tilkynningu Kviku viku síðar en Ármann tók formlega við störfum sem forstjóri bankans 15 .júní.

Samhliða því að gengið var frá ráðningu Ármanns var Marinó Örn Tryggvason, sem hafði starfað sem aðstoðarframkvæmdastjóri eignastýringar Arion banka frá árinu 2014, einnig ráðinn til Kviku, sem aðstoðarforstjóri bankans. Marinó mun taka til starfa hjá fjárfestingabankanum 1. ágúst næstkomandi.

Hluthafar Virðingar samþykktu í lok síðasta mánaðar með miklum meirihluta tilboð Kviku í allt hlutafé félagsins fyrir 2.560 milljónir. Verður hlutafé Kviku aukið um allt að 2.000 milljónir króna til að fjármagna kaupin á Virðingu. Á hluthafafundi bankans 14. júlí síðastliðinn samþykktu hluthafar Kviku tillögu stjórnar um að núverandi heimild til hækkunar hlutafjár félagsins yrði aukin um 200 milljónir að nafnvirði, eða úr 200 milljónum í 400 milljónir hluta.

Hannes Frímann er á meðal hluthafa Virðingar en hann á rúmlega 1,8 prósent í gegnum eignarhaldsfélagið Tindar sem er auk þess í eigu Frosta Reyrs Rúnarssonar, framkvæmdastjóra markaðsviðskipta Virðingar, og fleiri.