Hlaut heila­hristing og er enn með haus­verk en aga­nefnd gaf grænt ljós

Málið snýst um brot Slóvakans Eduard Kasca, sem leikið hefur með SR síðustu tvö tímabil, á Gabriel Egilssyni leikmanni Fjölnis í leik í Toppdeildinni fyrir viku. Brotið má sjá í myndbandinu hér að neðan.

Egill Egilsson, faðir Gabriels, skrifaði pistil um málið á Facebook en honum blöskrar sú niðurstaða aganefndar Íshokkísambands Íslands að ekkert skuli aðhafst frekar í málinu.

Egill segir son sinn hafa misst meðvitund í nokkrar sekúndur, hlotið heilahristing og sé enn í dag með mikinn hausverk. Fylgst sé náið með líðan hans en öll taugaboð séu þó í lagi. Egill segir Kascak ekki hafa sýnt neina iðrun vegna tæklingarinnar, hvorki í leiknum sjálfum á meðan hinn 16 ára Gabriel lá á svellinu né enn í dag þegar vika sé liðin frá leiknum.

Aganefnd er ósammála mati dómara leiksins um að um ákeyrslu á höfuð og háls hafi verið að ræða hjá Kascak.

Egill botnar ekkert í þessari niðurstöðu aganefndar. 

„Ég var sjálfur viðstaddur á leiknum og fyrir mér var ekki vafi á því að Eduard Kascak tæklaði Gabriel í höfuðið,“ skrifar Egill sem bendir á að reglur um bann við tæklingu í höfuð og háls séu settar til að vernda líf og heilsu leikmanna.

Blási upp bringuna og beini öxl að Gabriel

„Við skoðun myndbandsupptöku af leiknum sést hvernig Eduard Kascak skautar frá pökknum gagnstætt flæði leiksins en heldur áfram í átt að Gabriel sem fylgir leikflæðinu. Eðlilegt er að leikmaður í stöðu Eduards myndi beygja til hægri og elta pökkinn. Hann hins vegar kýs að fara í Gabriel og stöðva hann. Rétt áður en árekstur verður blæs Eduard upp bringu og beinir öxl sinni að Gabriel. Í myndbandinu er að sjá að öxlin lendir á höku Gabriels enda var hann með blæðandi sár eftir tæklinguna,“ skrifar Egill.

Egill segir hart tekið á svona brotum á öðrum Norðurlöndum og harmar að aganefnd ÍHÍ taki „afstöðu með ringulreið og ruddaskap“

„Aganefndin telur upp í sinni röksemdarfærslu atriði sem eru algerlega óviðkomandi því hvort um höfuðhögg hafi verið að ræða. Það eina sem nefndin lítur til er hvort höfuð Gabriels kastist til við áreksturinn. Það væri gilt sjónarmið ef tæklingin væri lóðrétt eða undir höfði. Hægri öxl Eduards lendir á höku sem leiðir til ofsnúnings á hálslið Gabriels,“ skrifar Egill.

„Því miður tók Aganefnd ÍHÍ afstöðu með ringulreið og ruddaskap“

„Af lestri úrskurðarins má álykta að málið virðist hafa fengið meðferð sem einkennist af hlutdrægni, ófaglegum vinnubrögðum og fyrir fram ákveðnum farvegi. Lýsandi leiks í beinu streymi er jafnframt formaður ÍHÍ en hann heyrist segja að leikmennirnir hafi einfaldlega rekist saman. Úrskurði Aganefndarinnar er ekki hægt að áfrýja. Þetta atvik og meðferð þess er íshokkííþróttinni hér á landi ekki til sóma. Á Norðurlöndum er hart tekið á svona brotum og brotlegir leikmenn geta átt von á löngu leikbanni. Stefnan hér á Íslandi virðist hins vegar vera sú að gerandinn fái að njóta vafans. Það sem eftir stendur er algert ósamræmi í stefnu sambandsins í að fyrirbyggja höfuðáverka. Hér var kjörið tækifæri til að taka skýra afstöðu gegn slíkum brotum.

Það sem veldur mér mestum áhyggjum er að það er ekki nokkur leið til þess að verjast slíkri tæklingu. Svona brot eru eins og elding úr heiðskíru lofti. Eduard Kascak sést ekki líta til baka til þess að athuga með líðan Gabriels sem lá meðvitundarlaus á ísnum. Gabriel er 16 ára. Skeytingarleysi hans undirstrikast enn fremur með því að hann hefur ekki enn beðist afsökunar á þessu atviki.

Þess má geta að Eduard sinnir þjálfun hjá barna- og unglingaliðum Skautafélags Reykjavíkur. Af framangreindu efast ég stórlega um hæfi og heilindi þessa manns til þess að sinna slíkum störfum. Íshokkí er fallegt sport þar sem heilt litróf íþróttaiðkunar fær að skína, allt frá grófum krafti til tærrar fimni. Til þess að geta stundað þessa íþrótt í fyrirsjáanlegu öryggi þurfa reglur og útfærsla þeirra að vera skýrar. Dómarar í þessum leik dæmdu rétt en því miður tók Aganefnd ÍHÍ afstöðu með ringulreið og ruddaskap,“ skrifar Egill.