Fékk „brjál­æðis­legt“ magn rasískra skila­boða eftir um­deilt at­vik

Gauff stöðvaði leik eftir að rafræn auglýsingaskilti meðfram vellinum flöktu í stigi undir lok fyrsta setts í 7-5, 6-1 sigri hennar í þriðju umferð gegn Sun, 16 ára stúlku sem vann nýlega unglingatitilinn á Opna bandaríska meistaramótinu.

Sun var í tárum á vellinum eftir atvikið sem kallaði á hörð viðbrögð. Gauff fékk fjölda skilaboða og mörg þeirra sem beindust gegn kynþætti hennar.

„Halló öll, ykkur má mislíka við mig eða vera ósammála um það sem gerðist án þess að vera kynþáttaníðingar,“ sagði Gauff í svari á X.

„Magnið af rasískum athugasemdum og einkaskilaboðum sem ég hef fengið síðustu klukkustundirnar er brjálæðislegt. Að lokum, ég er hvorki svindlari né þjófur.“

Sun virtist vera við það að vinna stigið þegar Gauff hætti að spila. Dómari leiksins fyrirskipaði síðan að stigið yrði endurtekið.

Gauff, sem hefur tvisvar unnið risamót og er í 4. sæti heimslistans, náði síðan tökum á leiknum á mánudag.

„Xinran er ótrúlega hæfileikarík og frábær leikmaður. Ég baðst afsökunar á atvikinu í lok leiksins og hún sýndi því fullan skilning,“ bætti Gauff við í annarri færslu.

Sun, sem fékk boðsæti frá mótshöldurum og var að leika sinn fyrsta leik á WTA-mótaröðinni, virtist niðurbrotin eftir tapið.

Gauff, sem komst í fjórðu umferð Wimbledon-mótsins 15 ára gömul árið 2019, sýndi Sun samkennd.

„Mér þótti leitt að sjá hana svona tilfinningaríka, því ég hef verið í hennar sporum og skil virkilega hvernig það er, en þetta er bara byrjunin á ótrúlegum ferli,“ sagði Gauff. „Það var heiður að deila vellinum með henni fyrir framan heimaáhorfendur hennar.“