Ekki sjái fyrir endann á upp­sögnum

Að minnsta kosti á annað hundrað manns hefur verið sagt upp í hópuppsögnum síðustu daga. Um tuttugu var sagt upp hjá Arion banka og rúmlega tuttugu í hópuppsögn hjá Íslenskum aðalverktökum fyrr í mánuðinum. 

Þá hefur Netapp hætt starfsemi sinni hér á landi og öllum sjötíu og fimm starfsmönnum fyrirtækisins verið sagt upp. Alls voru rúmlega átta þúsund og sjöhundruð á atvinnuleysisskrá í lok síðasta mánaðar.

Unnur Sverrisdóttir forstjóri Vinnumálastofnunar segir um að ræða þróun sem spáð hafi verið fyrir um en spáin geri ráð fyrir að hápunktinum verði náð í febrúar á næsta ári.

Þannig að við erum ekki búin að sjá fyrir endann á þessum uppsögnum sem eru í gangi núna þessa dagana? 

Nei, ég hef ekki trú á því,“ segir Unnur í viðtali í hádegisfréttum Bylgjunnar.

„Það er alltaf þessi árstíðabundna sveifla hérna á Íslandi að það dregst alltaf saman vinnumarkaðurinn yfir vetrarmánuðina þannig að það er ekkert nýtt. En það mun verða aðeins hærra núna í ár heldur en í fyrra og í fyrra var það aðeins hærra heldur en í hittiðfyrra þannig að þetta hefur farið stighækkandi.“

„Gæti orðið flókið“

Unnur segist ekki vera með tölur um fjölda hópuppsagna í septembermánuði, þær tölur verði gefnar út eftir mánaðamót. Spár greiningaraðila séu að ganga eftir en uppsagnir í byggingariðnaði séu mest áberandi.

„Hann hefur verið í mestum vanda. Svo förum við að finna fyrir afleiddum áhrifum, eins og kannski verslun og þjónusta og vöruflutningar og fleira. Svo má ekki gleyma að í lok september þá erum við að fara inn í árstíðabundna sveiflu á íslenskum vinnumarkaði, það er alltaf þannig. Þannig að þetta er ekki bara efnahagsástandið á þessu ári, þetta er kannski meiri kólnun en áður, en ekkert sem er að koma okkur á óvart.“

Þó uppsagnir í byggingariðnaði hafi verið áberandi er einnig um að ræða uppsagnir starfsfólks með sérhæfða þekkingu, líkt og hjá Arion Banka og Netapp, sem gæti lent í vandræðum með að finna störf við hæfi.

„Það er líka nýr veruleiki, það er alveg rétt. Það gæti orðið flókið ef fólk er með mikla sérfræðiþekkingu og missir störfin sín. Það er ef það kemur ekki eitthvað annað í staðinn.“