Bein út­sending: Kynna nýtt á­hættu­mat fyrir Grinda­vík

Fram kom fyrr í dag að meðal þess sem verður lagt til í nýju áhættumati sé að Grindvíkingum verði boðið að kaupa hús sín til baka. Forsendur fyrir varanlegri búsetu og skólahaldi í Grindavík séu ásættanlegar að því gefnu að skilgreindar öryggisforsendur séu uppfylltar og nauðsynlegar öryggisráðstafanir virkar. 

Í tilkynningu frá bænum segir að á fundinum verði kynntar fyrstu niðurstöður úr vinnu við nýtt áhættumat fyrir Grindavík. Lokið hafi verið við grunnvinnuna: Gagnalíkan, mælikvarða, vinnuferli og lifandi kerfi sem heldur utan um áhættuvísa og mótvægisaðgerðir fyrir Grindavík.

„Aðferðafræðin byggir á samráðsferli sem staðið hefur yfir undanfarna mánuði um áhættumiðaða ákvarðanatöku fyrir Grindavík, í þremur þáttum: Öryggi, húsnæði og skólahaldi. Með þessari vinnu hefur verið lagður grunnur að lifandi áhættumati með 23 áhættuvísum og 150 mótvægisaðgerðum sem snerta daglega tilveru í Grindavík. Markmiðið er að með virkum aðgerðum verði unnt að tryggja öryggi fólks sem dvelur, býr eða starfar í Grindavík, á sambærilegan hátt og í öðrum byggðarlögum sem búa við náttúruvá.“

Næstu skref verði síðan opinbert lifandi áhættumat með gagnsæi og rekjanleika, þar sem allir geti séð á hverju ákvarðanir byggja og hvernig niðurstöður eru fengnar.